У Якушоўцы гучаў "Магутны Божа".
Усклалі кветкі да помніка Рамуальду Траўгуту.
На помніку Каліноўскаму зьявілася новая шыльдачка.
Побач з помнікам Каліноўскаму прамаўляе Аляксей Янукевіч, кіраўнік партыі БНФ, адзіны з мінчукоў, хто ў гэты дзень даехаў у Свіслач.
На магіле Віктара Каліноўскага.
Ушанаванне паўстанцаў 1863 года пад кіраўніцтвам Кастуся Каліноўскага сёлета ў Свіслачы, няглtдзячы на юбілейныя 150-я ўгодкі паўстання, сабрала як ніколі мала людзей. І як ніколі раней шмат міліцыянтаў у цывільным і нават некалькі відэааператараў, таксама ў цывільным, здымалі на камеры.
Сёлета ў Свіслач ушанаваць паўстанцаў прыехала не болей за 50 чалавек.
Пераважна гэта былі гарадзенцы, актывісты з Ваўкавыска, мясцовыя актывісты і адзіны мінчук — кіраўнік партыі БНФ Аляксей Янукевіч. Урачыстасці адбываліся традыцыйна: усклалі кветкі на магіле Віктара Каліноўскага — брата Кастуся Каліноўскага — на гарадскіх могілках, затым арганізавана прайшлі па Свіслачы да помніка Кастусю Каліноўскаму, а таксама да помніка Рамуальду Траўгуту і ўсклалі там кветкі.
Прамовы выступоўцаў былі кароткія і зводзіліся да таго, што героі Беларусі не забытыя і будуць заўсёды шанавацца нашчадкамі. У Свіслачы зусім не выкарыстоўвалася нацыянальная сімволіка, паводле мясцовых актывістаў, міліцыянты загадзя аб гэтым папярэдзілі.
Пасля Свіслачы ўсе арганізавана пераехалі ў Якушоўку, у сядзібу Каліноўскіх. Усклалі кветкі каля крыжа, разгарнулі бел-чырвона-белыя сцягі і праспявалі «Магутны Божа». А пасля зрабілі традыцыйны агульны здымак на памяць.
Увесь гэты час за дзеямі назіралі міліцыянты і здымалі на некалькі камераў, але нікога не затрымлівалі.
