На выхадных у Чэхіі прайшлі датэрміновыя парламенцкія выбары. У красавіку чэшскі парламент прагаласаваў за самароспуск. Гэткім чынам дэпутаты выказаліся супраць прызначэнне прэм’ер-міністрам Іржы Руснака.
Найбольшую колькасць галасоў набралі сацыял-дэмакраты. За іх прагаласавала больш за мільён выбарцаў (20,45%). Сацдэкі атрымаюць 50 месцаў з 200 у парламенце, што на 6 меней, чым у папярэднія выбары.
На другім месцы аказалася новая цэнтрысцкая партыя АNO-2011. Партыю заснаваў мільярдэр славацкага паходжання Андрэй Бабіш. Партыя выступае з шэрагам папулісцкіх прапановаў: за адмену дэпутацкага імунітэту, за змяншэнне падаткаў для прадпрымальнікаў, змяншэнне тарыфаў на электраэнергію.
Сам Бабіш спрабаваў паднесці сябе як «чалавека з народа», знаёмага з праблемамі простых грамадзян. АNO набрала 18,65%.
На трэцім месцы Камуністычная партыя Чэхіі і Маравіі, якая нават палепшыла вынікі, павялічыла колькасць мандатаў з 26 да 33.
У Чэхіі эфект новых партый вельмі магутны. На гэтых выбарах стрэльнула ANO-2011, а на мінулых вялікага поспеху дасягнула толькі створаная ТОП-09, якую ўзначальвае міністр замежных справаў Чэхіі Карл Шварцэнберг. На гэтых выбарах ТОП згубіў 15 мандатаў.
Але самы аглушальны правал здарыўся з партыяй, якая нярэдка выйгравала выбары ў Чэхіі. Грамадзянская дэмакратычная партыя, якую патрэслі некалькі карупцыйных скандалаў, змагла набраць усяго 7,7%. І згубіць аж 37 месцаў у парламенце.
Таксама ў парламент трапляюць Хрысціянскія дэмакраты, якія не былі прадстаўленыя падчас мінулага склікання.
Пакуль цяжка адназначна казаць, хто ўтворыць кіроўную кааліцыю. Чэхію чакаюць доўгія перамовы аб большасці ў парламенце.