28.10.2013 / 20:12

Кузняцоў: У Беларусі ў 1930-1940-х бальшавікі рэпрэсавалі 1,5 млн чалавек 20

28 кастрычніка прадстаўнікі Беларускага аддзялення міжнароднага таварыства «Мемарыял», ініцыятывы «За ўратаванне мемарыялу Курапаты», хрысціянскага руху правялі ў Мінску брыфінг, прысвечаны ўшанаванню памяці ахвяр таталітарных рэпрэсій у Беларусі.

Як паведаміў кіраўнік Беларускага аддзялення «Мемарыялу» гісторык Ігар Кузняцоў, у гады савецкага таталітарызму расстрэлы мірных жыхароў праводзіліся ў 48 населеных пунктах Беларусі.

«Усяго нам вядома больш за 120 месцаў масавых расстрэлаў — гэта тых, дзе лік ідзе на дзясяткі і сотні ахвяраў. Колькі ж тых месцаў, дзе расстрэльваліся адзінкі і дзесяткі людзей, мы нават выказаць здагадку не можам», — адзначыў ён.

Па напаўафіцыйных звестках (звесткі ў кнізе Адамушкі, што выйшла ў пачатку 1990-х — НН), у Беларусі рэпрэсавана каля 600 тысяч чалавек — 250 тысяч па лініі судовых і несудовых органаў («двоек», «троек», асобых нарад) і 350 тысяч у адміністрацыйным парадку.

Паводле ўдакладненых звестак, якія прывёў Кузняцоў, у Беларусі было рэпрэсавана ў 1930-40-х гадах ад 1.430.000 да 1.625.000 чалавек

- гэта тыя, хто трапіў «ў юрыдычную і іншую дакументальную статыстыку».

На тэрыторыі Беларусі было расстраляна не менш за 377 тысяч чалавек. Большая іх частка знішчаныя ў Мінску і ваколіцах.

Каля 40 тысяч расстраляна ў Магілёўскай, 41 тысяча — у Гомельскай, 36 тысяч — у Віцебскай, каля 28 тысяч — у Мінскай, 11 тысяч — у Гродзенскай і 8 тысяч — у Брэсцкай вобласці.

«Так што, як бачыце, праблема ўшанавання памяці з'яўляецца вельмі актуальнай — бо тычыцца не дзясяткаў, не сотняў, а многіх тысяч, калі не мільёнаў людзей, якія трапілі пад рэпрэсіі», — сказаў на заканчэнне гісторык.

0
321-бах / Адказаць
28.10.2013 / 20:23
А нашчадкі гэтых людажэраў сёння намагаюцца дыктаваць нам сваю волю.
0
Беларусін / Адказаць
28.10.2013 / 20:37
5% насельніцтва, вырадкі. Трэба патрабаваць прызнання гэтых злачынстваў Расіяй
0
Юлій Каралёў / Адказаць
28.10.2013 / 21:48
"Падлікі" Кузняцова - гэта альбо татальная некампетэнтнасць, альбо бессаромная эксплуатацыя трагічнай гісторыі нашага народу. Ў Беларусі пры Сталіне была расстраляныя дзясяткі тысячаў чалавек - але ніяк не сотні тысячаў. Тое ж самае тычыцца фантастычных 1,5 мільёнаў ахвяраў рэпрэсій. Такой колькасці рэпрэсаваных проста не было. Яны існуюць толькі ў "падліках" як бы гісторыка Кузняцова. Чаму ніхто з журналістаў не папытаўся ў Кузняцова - а што гэта за разлікі? Не папрасіў паказаць лічбачкі? Даказваць злачыннасць сталінскага рэжыма праз неверагодныя перабольшанні, паралельна разважаючы пра ўшанаванне памяці прыдуманых соцень тысячаў ці нават мільёнаў "дадатковых" ахвяр - няўжо гэта маральна?
Паказаць усе каментары/ 20 /
Каб пакінуць каментар, калі ласка, актывуйце JavaScript у наладах свайго браўзеру