Пра гэта ён заявіў, выступаючы на форуме «Традыцыі. Моладзь. Будучыня»
«У нас ёсць тысячы, дзясяткі, сотні тысяч выдатных, сумленных, самаадданых работнікаў. Іх пераважная большасць. Але нямала і гультаёў, што граху таіць, і п'яніц, і разгільдзяяў. Можна са мной не згаджацца і спрачацца, але ёсць аб'ектыўныя факты. Наша прадукцыйнасць працы хранічна адстае не толькі ад еўрапейскіх краін і ЗША, але і ад многіх азіяцкіх дзяржаў», - канстатаваў Лукашэнка.
Ён таксама адзначыў, што ў краінах, якія дасягнулі вялікіх вышынь у эканоміцы, існуе зусім іншае стаўленне да працы:
«Дробны, сярэдні ды і буйны бізнэс на Захадзе, ва Усходняй Азіі — дзецішча людзей, апантаных не толькі і не столькі ідэяй узбагачэння. Часцей імі рухае імкненне даказаць, што ты лепшы ў сваёй справе.
Менавіта на такіх людзях — сумленных работніках і прафесіяналах, а зусім не на спекулянтах і аферыстах трымаюцца тыя дасягненні, якія ёсць у так званых развітых краінах», - адзначыў Лукашэнка.
У нас жа, заўважыў ён, многімі людзьмі бізнэс быў зразуметы па-іншаму — як свет лёгкай нажывы з прысмакам зладзейскай рамантыкі.
