28.09.2007 / 14:23

Працяг спэцапэрацыі "Эль Памідора":) Міліцэйскае ноў-хаў 5

А кажуць, ва ўладаў мазгі зусім закіслі! Піша ў сваім блогу Аляксандар Класкоўскі.

Арганізатара "Сацыяльнага маршу" Валера Ухналёва наведаў міліцэйскі прапаршчык. І прапанаваў даць арыгінальную расьпіску — гэтакую апрыёрную клятву ляяльнасьці. Падрабязнасьці вось тут.

А кажуць, ва ўладаў мазгі зусім закіслі! Старога змагара Ухналёва, канешне, на арапа ня возьмеш, але неабстраляную частку апазыцыйнага актыву такім саматужным прафіляктычным ноў-хаў можна і напалохаць.

Увогуле ж "Сацыяльны марш" напружвае кіроўныя вярхі відавочна болей, чым "Эўрапейскі". Апазыцыя палезла гуляць на поле прэзыдэнта. А крыць надта няма чым, бо рэсурсы дзяржаўнага сацыялізму на зыходзе.

У выніку камуністаў Калякіна (і ўвогуле левы флянг апазыцыі) душаць як ніколі. Прыпынілі на паўгоду дзейнасьць ПКБ. Арыштавалі палову накладу "Товарища". Ня кажучы ўжо пра вераломную спэцапэрацыю "Эль Памідора":), пад каўпак якой таксама патрапіў Валер Ухналёў.

А што ж вы думалі? Няма чаго замахвацца на сьвятое для нашай народнай ўлады — сацыяльную рыторыку! У нас, каб вы ведалі, толькі адзін абаронца простага люду.

Зрэшты, аналітык Валер Карбалевіч дапускае, што ў рэшце рэштаў афіцыйны лідэр можа пераступіць цераз сябе і ахвяраваць часткай звыклага электарату. Бо ўсё адно не дасі рады падтрымліваць патэрналісцкую мадэль. Так што, прагназуе экспэрт, імаверна, будуць запушчаныя мэханізмы аўтарытарнай трансфармацыі з пераарыентыроўкай на маладзейшыя, болей дынамічныя і прасунутыя пласты электарату.

Так ці не, але пакуль што апазыцыйныя камуністы патрапілі пад раздачу. Што да іхняга баявога органу, дык ратуе сайт. Дарэчы, без усялякіх кпінаў, у гэтай рэдакцыі працуюць профі, якія, хай сабе і пры пэўных ідэалягічных абмежаваньнях, робяць нармалёвае выданьне.

Мяне ж весяліць іхні дамэн. Бацькі вечна жывога вучэньня, мусіць, у трунах варочаюцца ад ідэалягічнага аксюмарану camarade.biz :)

Аляксандар КЛАСКОЎСКІ.

0
Ірма / Адказаць
28.09.2007 / 20:39
Мой муж ўжо падрыхтаваў да прыходу падобнага "прапаршчыка" начную пасудзіну з экскрэмэнтамі.
0
Zhauranak / Адказаць
29.09.2007 / 09:58
Сацыяльнай рыторыкі не хапае апазыцыі. Шкада, што гэта зразумелі толькі камунякі (якіх гнаць трэба ў шыю!)
0
Jan Dvor / Адказаць
29.09.2007 / 11:09
На маю думку, наклад "Товарішча" быў зарыштаваны з прычыны цікавага, але відавочна замоўленага расейцамі артыкула http://www.camarade.biz/page/1/bo/4849/article.html . Сацыяльныя маршы будуць актуальнымі з 1 студзеня 2008 г. Беларусы, на жаль, яшчэ не навучыліся думаць наперад. Відавочна, што амаль паралельная акцыя з Эўрапейскім маршам і якая па часе супадае са зборышчам недабойкаў-камунякаў у Менску з нагоды бальшавіцкага перавароту была падказаная з усходу.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру