Аднаму з затрыманых па крымінальнай справе, распачатай па факце забойства Аляксандра Марозава, настаяцеля Царквы Праабражэння Гасподняга, прад'яўлена абвінавачанне.
Як паведаміла БелаПАН афіцыйны прадстаўнік упраўлення Следчага камітэта па Віцебскай вобласці Іна Гарбачова, 22-гадоваму мужчыну інкрымінуецца забойства. Яму абраная мера стрымання ў выглядзе заключэння пад варту.
Нагадаем, праваслаўны святар незадоўга да здарэння даў згоду двум маладым мужчынам у сувязі з іх складаным матэрыяльным становішчам на часовае бязвыплатнае пражыванне ва ўласным доме.
У ноч на 22 лістапада паміж загінулым і пастаяльцамі ўзнік канфлікт, падчас якога Марозаву былі нанесены нажавыя раненні, ад якіх святар памёр.
Па словах Іны Гарбачовай, у ноч здзяйснення злачынства органам, які вядзе крымінальны пераслед, былі затрыманыя двое мужчын, заспетых на месцы злачынства.
У выніку правядзення допытаў і вочных ставак следства аднавіла аб'ектыўную карціну таго, што адбылося. Другі затрыманы мужчына вызвалены ў сувязі з тым, што падазрэнні ў здзяйсненні злачынства не пацвердзіліся.
