Што вы бачыце на гэтай фатаграфіі?
«Калі вы на ёй бачыце толькі рэчку, лецішчы, узлескі і грыбныя палянкі, то прыгледзьцеся больш уважліва, — піша ў сваім блогу лідар расійскай апазіцыі Аляксей Навальны. —
Вунь там, там-там, проста ў цэнтры фатаграфіі, вы бачыце ідэальнае тлумачэнне таго, чаму ж палітычны рэжым «Жабы_на_трубе» [так Навальны называе Пуціна — НН] так адмаўляецца ратыфікаваць арт. 20 Канвенцыі ААН па барацьбе з карупцыяй і так хваравіта рэагуе на спробы ўвядзення ў Крымінальны Кодэкс артыкула «незаконнае ўзбагачэнне», — паліць Навальны.
Гэта вёска Лёшкава Істрынскага раёна Маскоўскай вобласці. Там яшчэ нядаўна была будпляцоўка, а цяпер стаяць дыхтоўныя, багатыя палацы.
Адзін з участкаў тутака належыць «простаму шахцёру» і сакратару генеральнага савета партыі «Адзіная Расія» Сяргею Нявераву.
Нявераў, які ў атачэнні Пуціна грае ролю «простага шахцёра — чалавека працы», ніколі бізнэсам не займаўся, а апошнія гады сядзіць на нашай шыі на дзяржслужбе, значных даходаў не мае, але ўмудрыўся набыць «дачны ўчастак» коштам 92 мільёны расійскіх рублёў, які аформіў на сваю цешчу — 75-гадовую пенсіянерку з Новакузнецка.
Калі Навальны 4 верасня напісаў пра яго палац, Нявераў адказаў, што ён набыў і пабудуе гэта ўсё на «грошы, атрыманыя ад продажу кватэры ў Новакузнецку».
Па дэкларацыі мы бачым, што ў Няверава сапраўды была двухпакаёвая кватэра 67 кв.метраў у гэтым горадзе за Уралам.
Але кватэра 67 метраў у Новакузнецку несупастаўная па кошце з велізарным участкам на беразе Масквы-ракі і домам, які, напэўна, у два разы больш, чым галоўны палац піянераў у Новакузнецку.
«Возьмем яшчэ адзін з участкаў. Адразу відаць, што жыве тут чалавек з сучаснымі паняццямі аб загарадным доме. Еўрапеец тут жыве», — іранізуе Навальны.
Гэта Сяргей Эдуардавіч Прыходзька — намеснік старшыні ўрада Расіі і кіраўнік апарата ўрада.
Дарэчы, менавіта Прыходзька засвяціўся ў некаторых канфліктах з Беларуссю як прыхільнік жорсткіх мераў ціску на нашу краіну ў інтарэсах буйных расійскіх карпарацый.
Ва ўласнасці Прыходзька тут, на беразе ракі, — 280 сотак, або амаль 3 гектары зямлі. На ўчастку стаяць дом 1580 (!) кв.м і лазня 137 (!) кв.м.
Зямля ў гэтым месцы каштуе каля $25 тыс. за сотку.
«Гледзячы на фатаграфію «дзяржслужачага» Прыходзькі, мы рашуча адмаўляемся верыць, што ён не еў і не піў 34 гады, каб сабраць грошы на такія харомы», — іранізуе Навальны.
Падрабязней пра расследаванне Навальнага чытайце тут
