Фота Bobruisk.ru.
Аляксандр Лукашэнка абавязаў свайго памочніка — начальніка галоўнага ідэалагічнага ўпраўлення Усевалада Янчэўскага забяспечыць рэалізацыю дзяржаўнай палітыкі ў сферах інфарматызацыі і высокіх тэхналогій.
Гэта прадугледжваецца ўказам кіраўніка дзяржавы №531. У ім гаворыцца, што начальнік галоўнага ідэалагічнага ўпраўлення будзе каардынаваць дзейнасць дзяржаўных органаў і арганізацый у сферах інфарматызацыі, інфармацыйна - камунікацыйных тэхналогій, тэлекамунікацый і высокіх тэхналогій, у межах сваёй кампетэнцыі дае ім абавязковыя для выканання ўказанні і кантралюе іх рэалізацыю. У кампетэнцыі начальніка галоўнага ідэалагічнага ўпраўлення будзе таксама ўзгадненне праектаў нарматыўных прававых актаў, а таксама інвестыцыйных праектаў у названых сферах.
Таксама Усевалад Янчэўскі мае каардынаваць дзейнасць сродкаў масавай інфармацыі ў Інтэрнэце. Ён жа будзе прапаноўваць кандыдатуры на пасады ў дадзенай сферы і пільнаваць дзяржзакупкі ў ёй.
Тэкст дакумента размешчаны на сайце Нацыянальнага прававога інтэрнэт-партала.
Усевалад Янчэўскі займае сваю пасаду ад 2008 года. 37-гадовы Янчэўскі нарадзіўся ў Барысаве і ад студэнцкіх часоў удзельнічаў у палітычным жыцці. У адміністрацыю ён прыйшоў як старшыня Беларускага патрыятычнага саюза моладзі, папярэдніка БРСМ.
