3 снежня набыў законную моц прыгавор у дачыненні да 16-гадовага жыхара вёскі Казлоўка Светлагорскага раёна, сына памочніка выхавальніка дзіцячага дома сямейнага тыпу.
Ён абвінавачваўся ў згвалтаванні і гвалтоўных дзеяннях сексуальнага характару ў дачыненні да дзяўчынак сямі, дванаццаці і трынаццаці гадоў.
Як паведамілі ў пракуратуры Светлагорскага раёна, працэс праходзіў у закрытым рэжыме. 21 лістапада быў агучаны прысуд у дачыненні да абвінавачанага — дзевяць гадоў пазбаўлення волі з адбываннем пакарання ў папраўчай калоніі. Абвінавачаны не абскардзіў прысуд, ён набыў законную моц. Сваю віну падлетак прызнаў часткова.
Нагадаем, крымінальная справа першапачаткова была распачата ў дачыненні да 43-гадовага памочніка выхавальніка дзіцячага дома сямейнага тыпу аддзела адукацыі Светлагорскага райвыканкама.
Разам з жонкай яны выхоўвалі 13 дзяўчынак — сацыяльных сірот.
Мужчыну затрымалі вясной 2013 года па падазрэнні ў згвалтаванні адной з іх. Гэта здарылася пасля таго, як былая выхаванка зацяжарала і звярнулася ў медустанову. Падчас расследавання высветлілася, што падобныя дзеянні памочнік выхавальніка ўчыняў таксама ў адносінах і да іншых дзяўчынак.
Падчас следства стала вядома, што гвалтаваў дзяўчынак і родны сын памочніка выхавальніка.
Крымінальная справа ў дачыненні да 43-гадовага мужчыны цяпер слухаецца ў судзе.