03.10.2007 / 16:22

Збор сродкаў на крыж па Сысу 5

Помнік на магіле Анатоля Сыса да трэцяе гадавіны сьмерці паэта зьбіраецца паставіць скульптар Гэнік Лойка. Камень ужо замоўлены, але на выраб бракуе грошай.

Помнік на магіле Анатоля Сыса да трэцяе гадавіны сьмерці паэта зьбіраецца паставіць скульптар Гэнік Лойка. Камень ужо замоўлены, але на выраб бракуе грошай.

“Я добра ведаў Анатоля, ён лічыў мяне сябрам, — кажа скульптар. — Мы былі знаёмыя з тых часоў, калі ён быў у “Тутэйшых”, а я — у “Талацэ”. У мяне ёсьць скульптура, якую я зрабіў тады для “Тутэйшых”: “Вянок маладым беларускім паэтам”, цяпер яна захоўваецца ў музэі Багдановіча”. І самому Сысу Генік Лойка некалі падарыў невялікую скульптуру “Страцім-лебедзь”: “Памятаеце ягоны верш:

А ты, Страцім, адзін

у эвангельскім небе Радзімы...

Ты ляці. Не глядзі,

ты ж прывык да азёр у ільдзінах”.

Гэнік Лойка ўжо ствараў помнікі па дзеячах культуры. Напрыклад, па Міхасю Стральцову, Міхалу Дубянецкаму. Яго помнік па Сысу — стылізаваны крыж з барэльефам паэта ў цэнтры. Зьверху справа ў цярновым гнязьдзе прымасьцілася птушка, што сымбалізуе сабой «салаўінае сэрца» Беларусі. У ніжняй частцы крыжа — надпіс «Сыс Анатоль» з пазнакай году нараджэньня і сьмерці паэта.

Апроч Лойкі, у конкурсе, зладжаным аргкамітэтам па ўшанаваньні памяці паэта, бралі ўдзел скульптары Алесь Шатэрнік, Леў і Сяргей Гумілеўскія.

Помнік будзе з чорнага граніту (габро-дыябазу), вагою недзе 800 кг. Камень ужо замоўлены на заводзе «Белгран», што ў менскай Дражні.

«Спачатку яго мусяць разрэзаць, і мы перавязем яго да мяне ў майстэрню, — кажа спадар Лойка. — Менавіта на аплату паслуг заводу і транспарціроўку патрэбныя грошы — усяго паўтара мільёна рублёў. Потым пачнецца ужо менавіта мая праца».

Па словах сябра аргкамітэту, паэта Эдуарда Акуліна, усталяваньне і адкрыцьцё помніку плянуецца да трэцяй гадавіны з дня сьмерці Анатоля Сыса – у траўні 2008 г. у вёсцы Гарошкаў.

Сродкі на на выраб і ўсталяваньне помніка Сысу можна перадаць, зьвярнуўшыся па т.: (017) 284-44-04, 768-56-14 (Эдуард), (029) 955-92-04 (Гэнік).

Наталка Бабіна

0
Гянят / Адказаць
03.10.2007 / 19:55
А мо зрабілі б рахункі на EasyPay ды Webmoney, куды можна было б лёгка пераводзіць грошы?
0
Vagant / Адказаць
04.10.2007 / 10:28
Калі гэта грошай ня бракавала? Але Сысу даць - сьвятая справа. Каб жа яшчэ хто эпітафію склаў.
0
Filifionka / Адказаць
04.10.2007 / 13:35
Маю пытаньні да скульптараў. Першае - прынцыповае, а другое - так, сумневы. 1. Разьмяшчэньне імя пад прозьвішчам - махровы савок у кожным выпадку, і ў гэтым таксама. Лепей ужо напісаць проста СЫС. Бо кожны ў Беларусі, апрача немаўлят і бесталачаў, ведае, хто такі Сыс, як яго завуць і як ён жыў і пісаў. 2. Помнік трохі за-патасны, але, можа, гэты патас апраўданы. Аднак калега кажа, што такія помнікі ставяць браткі браткам. Мо й так, ня ведаю. Я не любіла помнік Гастэлу менавіта з-за гіпэр-трагізму і пера-патасу. У кожным выпадку, у нашым офісе тры асобы вырашылі грошай на помнік даць. Бо гэта СЫС.
Паказаць усе каментары/ 5 /
Каб пакінуць каментар, калі ласка, актывуйце JavaScript у наладах свайго браўзеру