03.10.2007 / 17:01

Дазвольны штамп для выезду за мяжу не адмяняюць? 8

Згодна з рашэньнем Канстытуцыйнага суду Беларусі штамп на выезд за мяжу мусіць быць скасаваны. Раней улады абяцалі, што дазвольныя запісы ў пашпартах адменяць ужо ў студзені 2008 году. Аднак у АВІРах грамадзянам і надалей ставяць дазвольныя штампы ў пашпарты на тэрмін да пяці гадоў, беручы за гэта плату.

Згодна з рашэньнем Канстытуцыйнага суду Беларусі штамп на выезд за мяжу мусіць быць скасаваны. Раней улады абяцалі, што дазвольныя запісы ў пашпартах адменяць ужо ў студзені 2008 году. Аднак у АВІРах грамадзянам і надалей ставяць дазвольныя штампы ў пашпарты на тэрмін да пяці гадоў, беручы за гэта плату.

У многіх пашпартных сталах супрацоўнікі рэкамэндуюць грамадзянам афармляць дазвольны штамп і надалей — тэрмінам да пяці гадоў.

Спадар Пётар нядаўна падоўжыў штамп на выезд на пяць гадоў.

«У мяне ў лютым заканчваўся штамп на выезд за мяжу. У пашпартным стале мне рэкамэндавалі падоўжыць яго. Я заплаціў 155 тысяч рублёў і падоўжыў штамп на пяць гадоў».

У АВІРах сытуацыю з чаканым скасаваньнем штампу не камэнтуюць, аднак працягваюць афармляць яго.

Вось рэкамэндацыя супрацоўніцы аддзелу грамадзянства і міграцыі Цэнтральнага раёну Менску:

«Калі вы плянуеце выехаць, і амбасада патрабуе, то лягічна будзе падоўжыць штамп».

Варта адзначыць, што амбасады не афармляюць візаў у пашпарты, у якіх тэрмін дзейнасьці дазвольнага штампу меншы за тры месяцы.

«На сёньняшні дзень ніякай афіцыйнай інфармацыі няма»

Дык ці адмяняюць дазвольны штамп? Кіраўніца прэсавага цэнтру Міністэрства ўнутраных справаў Кацярына Самусенкава‑Шэлегава пэўнага адказу на гэтае пытаньне не дае:

«На сёньняшні дзень ніякай афіцыйнай інфармацыі няма».

Карэспандэнтка: «А калі яна будзе?»

Самусенкава‑Шэлегава: «Калі будзе, мы паведамім насельніцтву і ўсім грамадзянам».

Дарэчы, сёлета ў ліпені міністар унутраных справаў Уладзімер Навумаў на сустрэчы з журналістамі чарговы раз заявіў, што штамп на выезд плянуецца адмяніць са студзеня 2008 году.

Яшчэ год таму МУС рэкамэндавала грамадзянам Беларусі не афармляць штамп дазволу на выезд ва ўсе краіны сьвету больш як на два гады.

Нагадаю, што на хадайніцтва экс‑дэпутата Палаты прадстаўнікоў Уладзімера Парфяновіча Канстытуцыйны суд пастанавіў адмяніць дазвольны запіс яшчэ ў верасьні 2002 году.

Плянавалася, што яго скасуюць у 2006 годзе, потым тэрмін адмены штампу перанесьлі на пачатак 2008 году.

Тады ж меркавалася адмяніць і гэтак так званыя «дата‑штампы», якія ставяць памежнікі ў пашпартах пры перасячэньні мяжы. Да гэтага часу павінна быць створаная адзіная сыстэма ўліку грамадзянаў, і ўсе памежныя пункты пропуску павінны займець аўтаматызаваную сыстэму кантролю.

Гэтаксама павінен быць створаны банк зьвестак асобаў, права на выезд якіх з тэрыторыі Рэспублікі Беларусь часова абмежаванае.

Начальнік аддзелу кантролю за выкананьнем судовых рашэньняў Канстытуцыйнага суду Вячаслаў Скірда адзначае, што рашэньне Канстытуцыйнага суду абавязковае для выкананьня.

«Усталяваны тэрмін — 31 сьнежня 2007 году. Я чытаў у друку: Навумаў дакладна кажа, што будзе адменены. Сёньня яшчэ кастрычнік. Гаварыць пра тое, што ён ня будзе адменены, яшчэ рана».

Старшыня Беларускага Хэльсынскага камітэту Тацяна Процька лічыць, што праз дазвольныя штампы беларуская дзяржава кантралюе сваіх грамадзянаў:

«Толькі дзеля гэтага яны і існуюць. Як толькі ў нашай краіне ўзмацняецца тэндэнцыя гэтага кантролю над асобай, так гэтыя ўсе штамы рэальна пачынаюць узмацняцца і існаваць».

Невядома, ці кампэнсуюць у выпадку скасаваньня штампу сумы, якія грамадзяне ўжо заплацілі за афармленьне дазвольнага запісу — некаторыя да 2012 году. Дзеяньне штампу на кожны год каштуе адну базавую велічыню, цяпер гэта 31 тысяча рублёў.

У суседніх Расеі і Ўкраіне грамадзяне маюць два пашпарты — унутраны і замежны. У літоўцаў, палякаў, латышоў, як і ў беларусаў, — агульнаграмадзянскі пашпарт, зь якім можна выяжджаць за мяжу. Але там ніякіх дазвольных штампаў не патрабуюць.

Ганна Соўсь, Radio Free Europe / Radio Liberty

0
беларус / Адказаць
03.10.2007 / 18:31
Калі Рыгоравіч не адменіць гэты штамп, то ніхто яго не адменіць. Бо МУС і КДБ маюць с таго кавалак хлеба. Але калі чыноўнікі твораць беззаконне з людзьмі, то народ, за гэта, звальвае ўсё на Лукашэнку. Вось так рэйтынг змяншаецца ў Рыгоравіча.
0
niejkaja dziauczynka / Адказаць
03.10.2007 / 23:31
а ў Рыгоравіча штамп ёсць?
0
niejkaja dziauczynka / Адказаць
03.10.2007 / 23:38
....а што рабіць тым, хто зараз замяжой, тэрмін штампа хутка сканчваецца (у лютым. Паверыла сваім уладам пра казку пра пачатак студзеня 2008 і не падаўжала, калі яшчэ быў час дома (((((...........), а вяртацца збіраюцца не вельмі хутка? Што, больш не выпусцяць? Ці яшчэ весялей - не пусцяць :))))))))))))))))))))
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру