12.12.2013 / 17:09

Зязюля — птушка 2014 года 8

Зязюля звычайная. Фота Дзмітрыя Якубовіча.

Грамадская арганізацыя «Ахова птушак Бацькаўшчыны» (АПБ) выбрала птушкай 2014 года зязюлю звычайную!

Пра гэта паведамляецца на сайце арганізацыі.

Традыцыйна, у рамках кампаніі «Зязюля — птушка 2014 года» будзе арганізаваны шэраг конкурсаў і мерапрыемстваў, мэта якіх прыцягнуць увагу да праблем гэтага віду. Пра іх можна будзе давецца пазней на сайце ptushki.org.

Нацыянальную кампанію «Птушка года» АПБ праводзіць з 2000 года.

Галоўная мэта кампаніі — прыцягнуць увагу насельнiцтва да хараства прыроды і птушак, што жывуць вакол нас. У мінулыя гады сімваламі Беларусі былі: белы бусел, белая пліска, авяльга, дамавы верабей, гарадская ластаўка, барадатая кугакаўка, кнігаўка, звычайны салавей, вялікая белая чапля, шэрая гусь, сокал-пустальга, вялікі кулён, чорны свіргуль, удод.

У 2013 годзе Беларусь далучылася да міжнароднай праграмы па спадарожнікавым сачэнні за звычайнай зязюляй.

З дапамогай спецыяльных датчыкаў, якія замацоўваюцца на птушках, можна атрымаць інфармацыю пра іх месцазнаходжанне у рэжыме рэальнага часу, што дазваляе вызначыць шляхі міграцыі і месца зімоўкі.

Такі метад дазваляе даведацца больш пра гэты, здавалася б, звычайны від. На пяці беларускіх зязюлях ужо з’явіліся датчыкі, а у новым годзе плануецца далучыць да сачэння яшчэ дзесяць птушак.

На працягу некалькіх месяцаў мы назіралі, куды ляцяць Норберт, Віктар, Юлія, Філ і Павел. Спадзяемся, што ў 2014 годзе вы з вялікім інтарэсам будзеце разам з намі працягваць сачыць за беларускімі зязюлямі.

«Лічыцца, што зязюлі – нашы птушкі, беларускія, але ў Беларусі яны праводзяць толькі тры месяцы ў год. Большую частку года яны мігруюць альбо знаходзяцца на зімоўцы ў Афрыцы. Таму праз зязюлю мы хочам яшчэ раз звярнуць увагу на значнасць міграцый і зімовак для птушак. На тое, што захаванне міграцыйных відаў мажліва толькі ў трансгранічным кантэксце»,распавёў Віктар Фянчук, дырэктар АПБ.

Колькасць зязюлі ў Еўропе скарачаецца ў сувязі са зменай практык вядзення сельскай гаспадаркі. У Беларусі сітуацыя лепш, таму нашыя дадзеныя дазволяць лепш зразумець асаблівасці біялогіі гэтага незвычайнага віда.

10 цікавых фактаў пра зязюлю:

1. Кукуе толькі самец. Голас самкі падобны да чалавечага рогату.

2. Самкі маюць дзве морфы — шэрую і рудую.

3. З-за завостраных крылаў і паласатага малюнка на жываце падчас палёту зязюля падобна да драпежнай птушкі. Дзякуючы гэтаму самец зязюлі палохае птушку-гаспадара гнязда, а ў гэты час самка падкідвае яйка.

4. Зязюлі хапае ўсяго 10-16 секунд, каб падкласці яйка ў гняздо.

5. Зязюля падкідвае яйкі ў гнёзды не ўсім відам птушак, але спіс «ахвяраў» налічвае больш за 100 відаў.

6. Падкінутыя яйкі амаль супадаюць па колеры з яйкамі гаспадароў гнязда. Самка зязюлі за адзін сезон можа адкласці ад 8 да 25 яек, праўда, на кожныя 5 падкінутых яек вырастае толькі адно птушаня.

7. Час ад адкладкі яек да вылуплення птушанят у зязюлі менш, чым у тых, у чыіх гнёздах яны знаходзяцца.

8. Зязюля — дальні мігрант. Узімку яна ляціць у Афрыку. Ляцяць птушкі часцей за ўсё не чарадой, а паасобку.

9. Зязюлі ядуць вусеняў, пакрытых валаскамі, якіх іншыя птушкі не чапаюць. Так адбываецца з-за таго, што валаскі упіваюцца ў асаблівае пакрыццё сценак страўніка птушкі, а потым гэта пакрыццё выводзіцца са страўніка разам з валаскамі.

10. У паданнях шматлікіх народаў зязюля з’яўляецца сімвалам дабрабыту.

0
Палясоўшчык / Адказаць
12.12.2013 / 20:14
Пракукуй зязюля : ці доўга трываці , Каб скончылась ўлада "жастокага" баці ?
0
1 / Адказаць
13.12.2013 / 08:12
Фото- просто супер. НН, хотелось бы ещё других птиц посмотреть да и вообще побольше природы.
0
Valkyrja / Адказаць
13.12.2013 / 09:37
Не гледзячы на тое, што зязюля непрацяглы час знаходзіцца на нашай тэрыторыі, аднак па "ментальнасці" гэта наша птушка: 1. Адкладвае яйкі ў чужыя гнёзды; пры гэтым самец палохае гаспадароў, каб справа скончылася паспяхова... сямейнае жыццё ў зязюль не вельмі добрае, калі не могуць выгадаваць птушанят, затое знаходзяць агульную мову ў справе збагрыць дзяцей іншым... 2. Падкінутыя яйкі амаль супадаюць па колеры з яйкамі гаспадароў гнязда. 3. Зязюлі ядуць вусеняў, пакрытых валаскамі, якіх іншыя птушкі абыходзяць. Калі робіцца неўмагату, адрыгваюць гэта смецце...
Паказаць усе каментары/ 8 /
Каб пакінуць каментар, калі ласка, актывуйце JavaScript у наладах свайго браўзеру