Ранняя падкормка можа нашкодзіць вадаплаўным птушкам, папярэджваюць прадстаўнікі ГА «Ахова птушак Бацькаўшчыны» (АПБ).
«Не ўсіх птушак, якіх можна сустрэць у Беларусі ў пачатку зімы, трэба падкормліваць», — гаворыцца ў паведамленні АПБ.
Паводле звестак арнітолагаў, такія птушкі, як сініца, верабей, дубанос, зелянушка, з'яўляюцца аселымі і ў любым выпадку застануцца зімаваць у Беларусі, аднак шэраг вадаплаўных (напрыклад лебедзі) зляцяць, як толькі зразумеюць, што ўжо не здольныя пракарміцца на гэтай тэрыторыі.
Спецыялісты адзначаюць, што дробных птушак падкормліваць можна ўжо цяпер, развешваючы кармушкі на дрэвах і за акном, але вадаплаўным такая ранняя падкормка нанясе толькі ўрон.
«Людзі часта падкормліваюць іх у добрае надвор'е, а птушкі, вырашыўшы, што корму хопіць, застаюцца зімаваць.
А вось калі дапамога ім сапраўды неабходная (моцныя снегапады, экстрэмальныя маразы), яны застаюцца самі па сабе, бо мала хто пойдзе ў завіруху да вадаёма, каб пакарміць лебедзя або качку», — адзначаюць у АПБ.
Арнітолагі рэкамендуюць карміць вадаплаўных птушак толькі з наступленнем моцных маразоў.
