Дэфіцыт рахунку бягучых аперацый плацежнага балансу склаў 4 млрд. 826,8 млн. долараў па выніках за студзень—верасень 2013 года, сведчаць статыстычныя звесткі, якія прыводзіць у плацежным балансе Нацыянальны банк.
Трэба адзначыць, што за аналагічны перыяд 2012 года ў Беларусі быў зафіксаваны прафіцыт рахунку бягучых аперацый плацежнага балансу ў памеры 68,6 млн. долараў. Такім чынам, у параўнанні з мінулым годам рахунак бягучых аперацый плацежнага балансу пагоршыўся амаль на 5 млрд. долараў.
Негатыўная дынаміка абумоўлена, галоўным чынам, пагаршэннем паказчыкаў гандлёвага балансу Беларусі. У студзені—верасні 2013 года адмоўнае сальда знешняга гандлю таварамі (па метадалогіі плацежнага балансу) склала 373,4 млн. долараў (супраць станоўчага сальда ў памеры 3,9 млрд. долараў за аналагічны перыяд 2012 года).
Як паведамлялася раней, эканамічныя ўлады Беларусі прагназуюць, што па выніках 2013 года дэфіцыт рахунку бягучых аперацый плацежнага балансу можа скласці 6,3 млрд. долараў. Такая ацэнка прыводзіцца ў праекце прагнозу сацыяльна-эканамічнага развіцця, які падрыхтавала Міністэрства эканомікі.
Трэба адзначыць, што прадстаўнікі Міжнароднага валютнага фонду выказваюць занепакоенасць у сувязі з рэзкім ростам дэфіцыту рахунку бягучых аперацый плацежнага балансу Беларусі ў гэтым годзе.