Спадабаўся загаловак вось гэтага трохі іранічнага матэрыялу Сашы Зайцава ў "Беларускіх навінах" — "За кілбасу і свабоду!". Нечакана трапна адлюстравана спэцыфіка цяперашняй палітычнай восені, калі апазыцыя, бадай, упершыню ўзялася за спалучэньне прыземленых і высокіх лёзунгаў. "Сацыяльны марш" грае, груба кажучы, на кілбасным мэнталітэце, а "Эўрапейскі"— на ідэалах волі.
Зрэшты, дзе болей свабоды, там болей і кілбасы. Прычым яна смачнейшая. Мае дзеці шчыра засмуціліся, калі наша мытня стала трэсці суайчыньнікаў на прадмет увозу мясных прадуктаў. (Дарэчы, патлумачце цёмнаму чалавеку: калі яны ставяць заслон птушынаму грыпу, то чаму тармозяць любое мяса?). Раней жа заўсёды прыхопліваў гасьцінец зь Літвы ці Польшчы — колькі там пакецікаў сыравэнджанай кілбаскі. У нашых крамах падобная таксама ляжыць, але на смак — неба і зямля: наша часьцяком — як мыла, а тая ў роце растае. Дый асартымент непараўнальна шырэйшы. А вось кошты, наадварот, параўнальныя — пры тым што ў летувісаў сярэдні заробак ужо пад 800 даляраў!
Вось гэтыя простыя рэчы варта было б і тлумачыць простымі словамі падчас перадмаршавай агітацыі. А так камэнтары на асобных праэўрапейска-дыялёгава-з-уладаю-арыентаваных сайтах:) нагадваюць патасам і агульнымі словамі колішнія савецкія рубрыкі "Насустрач зьезду":)
Тым часам наведнікі сайту "НН", я гляджу, сурёзна пакрыўдзіліся на выказваньне Віктара Івашкевіча. Ягоную фразу пра імаверную колькасьць удзельнікаў шэсьця некаторыя ўспрынялі як маніпуляцыю. Маўляў, хто ня выйдзе на марш — той не эўрапеец (утрыраваны адпаведнік: "Хто ня з намі — той казёл!").
Рэакцыя сьведчыць, што нашым апазыцыйным дзеячам варта ўлічваць: тутэйшыя эўрапейцы, як усе сапраўдныя эўрапейцы — людзі з годнасьцю, да іх патрэбен тонкі падыход:)
