Лідар гурту «Палац» задумаў зрабіць канцэрт-карнавал і абяцае ўзнагароду за самы прыгожы святочны строй.
«Традыцыя каляднага карнавалу, святочнага маскіравання, на жаль, захавалася ў Беларусі толькі ў вясковым асяроддзі. Гэту традыцыю трэба адраджаць. І адраджаць у сучасных, гарадскіх, клубных умовах», — упэўнены Алег Хаменка.
Сапраўдны беларускі карнавал мяркуецца правесці якраз на канцэрце гурту «Палац» 6 студзеня ў клубе Re:Public. Музыка прапануе закласці новую традыцыю ды запрашае ўсіх прыходзіць у святочных строях абсалютна адвольнага фармату - кожны вольны апрануцца так, як толькі дазволіць яго фантазія.
За найлепшы святочны касцюм вечара Хаменка абяцае грашовы прыз памерам 1 млн рублёў.
Святочную атмасферу 6 студзеня ў Re:Public будуць ствараць гурты «Альтанка», Guda, «Ветах», «Літы талер», а разынкай вечара будзе вялікі сольны канцэрт «Палаца».
