03.01.2014 / 17:58

Навагодні сюрпрыз: падатковы кодэкс паправілі задняй датай 3

«Беларускія ўлады ў 2014 годзе прадоўжылі змяненне падатковага заканадаўства задняй датай», — канстатаваў кіраўнік Асацыяцыі малога і сярэдняга прадпрымальніцтва Сяргей Балыкін. Такім чынам ён пракаментаваў тую акалічнасць, што найважнейшыя папраўкі ў Падатковы кодэкс і іншыя нарматыўныя акты па пытаннях падаткаабкладання, а таксама закон аб рэспубліканскім бюджэце на 2014 год былі афіцыйна апублікаваныя толькі 2 студзеня, а ўступілі ў сілу на дзень раней.

«Найважнейшыя падатковыя законы ўведзены ў сілу задняй датай. Прэзідэнт падпісаў гэтыя законы 31 снежня і тым самым фактычна парушыў уласную дырэктыву № 4, якая патрабуе загадзя паведамляць суб'ектам гаспадарання пра змены заканадаўства і публікаваць такія змены не пазней, чым за тры месяцы да ўступлення іх у сілу», — адзначыў эксперт.

Паводле яго слоў, нават беглы аналіз актаў паказвае, што яны ўносяць досыць сур'ёзныя змены ва ўмовы дзейнасці суб'ектаў гаспадарання: «Гаворка ідзе пра змены парадку выплаты падатку на прыбытак, змяненне ставак патэнтавай пошліны, змянення парадку дэкларавання ПДВ і, вядома ж, увядзенне «транспартных пабораў» — пошліны за допуск да ўдзелу ў руху транспартных сродкаў», — нагадаў кіраўнік АМІСП.

Ён падкрэсліў, што гэтыя і іншыя змены патрабуюць сур'ёзнага вывучэння з боку кіраўнікоў і галоўных бухгалтараў суб'ектаў гаспадарання. «Аднак дзяржава ў чарговы раз не прадаставіла ім такой магчымасці і па сумнай традыцыі змяніла падатковае заканадаўства задняй датай, - канстатаваў эксперт. - Не будзем наракаць чыноўнікам на тое, што яны ў чарговы раз не сталі ўзгадняць падатковыя змены з шырокімі коламі дзелавой супольнасці. Але элементарная ветлівасць прадугледжвае магчымасць бізнэсу загадзя азнаёміцца з правіламі гульні і выпрацаваць сваю стратэгію».

«Без такой элементарнай умовы казаць аб цывілізаваных умовах для бізнэсу ў краіне не даводзіцца», — заявіў кіраўнік Асацыяцыі малога і сярэдняга прадпрымальніцтва.

0
u.l. / Адказаць
03.01.2014 / 22:00
"... задняй датай"? Гэта ваша задняе слова? (© Кін-дза-дза). Рэд. Падабаецца Вам ці не, але гэткі выраз існуе ў мове.
0
u.l. / Адказаць
04.01.2014 / 08:57
Цiкава, у якой такой мове iснуе гэты выраз? У той, у якой iснуюць "рабяты", "аткрыткi" ды iншыя моўныя пачвары? У мове, якою вы карыстаецеся з дапамогаю гугла? Чакаю цытаты ад Крапiвы. Раней я меркаваў, што тая бязграматнасьць, якая назiраецца ў вашым выданьнi, паходзiць ад браку досьведу. Цяпер я разумею, што гэта сьвядомая пазыцыя. Становяцца больш вiдавочнымi тыя ўмовы, на якiх рэжым дазваляе вам iснаваць. I яшчэ, мне не падабаецца ня толькi ваш выраз "задняя дата". Мне не падабаецца ў цэлым зьдзек з мовы. Мне не падабаецца, калi выкараняюць мiтычныя "палянiзмы" i займаюцца вiдавочнаю i бессаромнаю русыфiкацыяю. Мне не падабаецца цэнзура ды выразаньне кавалкаў з чужых тэкстаў з мэтаю манiпуляваньня.Мне не падабаецца, калi замест высоўваньня ўласных аргумантаў спрабуюць проста заткнуць апанэнту рот. Мне ў рэшце рэшт не падабаецца тое, у што ператварылася НН. З вашых "задняе даты" ды "задняга слова" не магло выйсьцi нiчога, акрамя таго, што звычайна выходзiць зь любога "задняга мейсца". Суцэльнае г**но.
0
Alieś / Адказаць
04.01.2014 / 11:35
u.l.: распальваць касьцёр ва ўласнай хаце вы лічыце натуральным? Лепш бы вы с такім імпэтам накідваліся на ўладу, якая варожа ставіцца да нашай мовы. А калі ёсьць моўныя заўвагі іх трэба вырашаць мірна, прапануючы лешыя варыянты і прыклады выкарыстаньня класікаў мовы.
Каб пакінуць каментар, калі ласка, актывуйце JavaScript у наладах свайго браўзеру