Пракуратурай Мінскай вобласці па матэрыялах распачата крымінальная справа ў дачыненні да старшыні Гарадзейскага пасялковага выканаўчага камітэта Нясвіжскага раёна.
Як паведаміў старшы пракурор аддзела па барацьбе з карупцыяй і арганізаванай злачыннасцю пракуратуры Мінскай вобласці Аляксандр Ганчар, чыноўнік з'яўляецца падазроным ва ўчыненні злачынства, прадугледжанага ч. 3 арт. 426 КК (перавышэнне ўлады асобай, якая займае адказнае становішча).
Чыноўнік падазраецца ў тым, што, працуючы старшынёй пасялковага выканаўчага камітэта, займаючы адказнае становішча, у перыяд з кастрычніка 2010 года па май 2011 года наўмысна ўчыніў дзеянні, якія яўна выходзілі за межы дадзеных яму па службе правоў і паўнамоцтваў, а менавіта парушыў дзейнае заканадаўства аб зямлі.
Ведаючы, што зямельныя ўчасткі, выдзеленыя для будаўніцтва і абслугоўвання жылых дамоў, раздзелу не падлягаюць, ён распачаў незаконныя дзеянні, скіраваныя на раздзел зямельнага ўчастка, атрыманага ў спадчыну грамадзянінам З. пасля смерці сваёй маці для наступнага будаўніцтва на ім жылога дома грамадзянінам Л.
Кіраўнік мясцовага органа дзяржаўнай улады і кіравання, увёўшы ў зман членаў выканкама, арганізаваў прыняцце незаконнага рашэння аб даванні іншаму грамадзяніну ў пажыццёвае спадчыннае валоданне часткі зямельнага ўчастка, які фактычна належаў З., чым былі парушаныя яго канстытуцыйныя правы.
Крымінальная справа накіраваная для расследавання ва ўпраўленне Следчага камітэта па Мінскай вобласці.
