Пра гэта ў сваім Фэйсбуку напісала актывістка Аб'яднанай грамадзянскай партыі (АГП) Аксана Крышчановіч.
Лідара АГП затрымалі раніцай каля гаража, ён збіраўся ехаць у офіс партыі, што знаходзіцца каля Камароўкі.
Нагадаем, што раней Лябедзька заяўляў, што будзе сёння, 12 студзеня, а 12-й працягваць збор подпісаў у цэнтры горада, на плошчы Якуба Коласа, за адстаўку ўрада і за адмену пошліны на допуск аўто да руху.
«Я гатовы дапамагчы ў справе самаарганізацыі тым, каго цяперашняя сістэма і палітыка не проста дасталі (такіх у краіне большасць), а хто гатовы рэальна нешта рабіць, а не толькі скуголіць і скардзіцца самому сабе на кухні», — напісаў 9 студзеня А. Лябедзька ў сваім Фэйсбуку.
Дарэчы, па законе збор подпісаў не патрабуе нейкіх узгадненняў і атрымання дазволаў ва ўладаў.
Перад 16:00 Анатоль Лябедзька на сваёй старонцы ў фб паведаміў, што знаходзіцца ў міліцыі.
«Я ў апорным», — напісаў ён. «Я ў Савет [відаць, аддзяленне міліцыі ў Савецкім раёне] Ну і вонь тут Апорны», — дадаў ён у наступным допісе.
Ён пасля паведаміў, што знаходзіцца ў апорным пункце міліцыі Савецкага раёна Мінска, што па зав. Якуба Коласа, 15, корп. 2. За правядзенне 5 студзеня ў Мінску збору подпісаў за адмену аўтапошліны на яго складзены пратакол на падставе п. 3 артыкула 23.34 Кодэкса аб адміністрацыйных правапарушэннях (Парушэнне парадку арганізацыі ці правядзення масавых мерапрыемстваў). Санкцыі гэтага артыкула цягнуць накладанне штрафу ад дваццаці да пяцідзесяці базавых велічынь ці адміністрацыйны арышт, паведамляе БелаПАН.
Лябедзька таксама сказаў, што суд над ім прызначаны на 15 студзеня ў судзе Савецкага раёна.
***
Нагадаем, лідар АГП быў затрыманы ў Мінску сёння раніцай. Ён выйшаў з дома і накіраваўся ў гаражны кааператыў па машыну, пасля чаго раздаўся званок па дамафоне і мужчынскі голас паведаміў жонцы Лябедзькі пра яго затрыманне. Дзе цяпер знаходзіцца палітык, невядома. Яго тэлефон не адключаны, але на званкі ён не адказвае.
Cёння ў 12 гадзін каля сталічнага Камароўскага рынку Лябедзька меў намер зноў збіраць подпісы ў падтрымку адмены аўтапошліны і адстаўкі ўрада. Тыдзень таму Лябедзька, а таксама сустаршыня кампаніі «За справядлівыя выбары» Віктар Карняенка таксама каля Камароўскага рынку збіралі подпісы. Пры гэтым за іх дзеяннямі назірала беспрэцэдэнтная колькасць супрацоўнікаў міліцыі і спецслужбаў, якія, аднак, не перашкаджалі падзеям.
