Былы міністр абароны Украіны Анатоль Грыцэнка заклікаў легальных уласнікаў зброі мець яе з сабой на Майдане.
«Калі ўлада не абараняе жыцця людзей, я заклікаю тых, хто мае легальную зброю, выйсці на абарону Майдану і на патруляванне вуліць са зброяй, легальнай зброяй», — цытуе яго афіцыйнае агенцтва Укрінфарм.
«Я буду першы, я і цяпер са зброяй, і я буду тое рабіць, гэта не заклік да гвалту, гэта заклік да спакою», — дадаў былы міністр, які цяпер народны дэпутат Украіны.
Грыцэнка падкрэсліў, што зброю трэба выкарыстоўваць толькі для самаабароны і ні ў якім разе першым.
За мінулы тыдзень загінулі прынамсі 5 дэманстрантаў, яшчэ некалькі зніклі без вестак. Прычым людзей выкрадаюць не з Майдану, а каля кватэр або ў горадзе. Аднаго з выкрадзеных, навукоўца-сейсмолага з Львова, знайшлі закатаваным у лесе пад Кіевам.
Паводле вынікаў незалежнага расследавання, забітыя на вуліцы Грушэўскага, у тым ліку беларус Міхал Жызнеўскі, загінулі ад пападання кулі, выпушчанай з гладкаствольнага ружжа 12-міліметровага калібра. Прычым агонь вёўся з блізкай адлегласці. Выказваліся меркаванні, што асобныя экстрэмісты з ліку байцоў спецпадраздзяленняў зараджалі такія латунныя паляўнічыя кулі ў ружжы, якія выкарыстоўваюцца для стральбы гумовымі кулямі. Тэхнічна гэта магчыма.
Жызнеўскі і іншы актывіст, Нігаян загінулі ўранку 22 студзеня ў часе спробаў спецпадраздзяленняў, верных Віктару Януковічу, ачысціць вуліцу Грушэўскага ад дэманстрантаў.
