Адзін з фанатаў БАТЭ ананімна распавёў Радыё Свабода, як міліцыя ў Барысаве пераследуе заўзятараў за акцыю ў падтрымку Украіны.
«У мінулыя выходныя валейбольны БАТЭ гуляў у Барысаве два матчы ў залі. Там ёсць камеры назірання, на якіх відаць, як група людзей проста пасля матча выходзіць з будынку, спускаецца з балкона.
Пасля двух чалавек з апазнаных па камеры запрасілі на размову, паказалі запіс на відэа. Яны сябе пазналі: «Так, я вось выходжу з залы на вуліцу і іду пасля дахаты».
Але на фота з плакатамі ў падтрымку Украіны яны адмаўляліся сябе пазнаваць. Тым не менш у судзе ёсьць прызнаўчыя паказанні абодвух.
Я думаю, іх проста паставілі перад фактам: пагаджаешся — 5 сутак, не пагаджаешся — 15.
Першы хлопец на сто працэнтаў прызнаўся.
А з другім хлопцам — проста жах. Яму пазванілі зранку і запрасілі на размову. Ён сказаў, што без позвы нікуды не пойдзе, тады за ім прыехалі дахаты. Пасля таго як ён быў тры гадзіны ў РУУС, прыехалі туды ягоны бацька з адвакатам. Ён за гэты час яшчэ пазваніў сваёй дзяўчыне, якая была з ім на валейболе. Яна таксама пацвердзіла, што на відэа ён і што яны разам выходзяць і ідуць дахаты. Але на фота яна яго не апазнала. Распісалася ў паказаннях і яе адпусцілі.
А хлопца ў той жа дзень асудзілі.
Бацьку з адвакатам сказалі, што паперы ў суд павезлі канвойныя. Яны дзве гадзіны не ведалі, што з хлопцам, бо ў судзе кажуць, што не прывозілі, а ў міліцыі — што адвезлі. Урэшце бацька з адвакатам пад канцылярыяй праседзелі.
А хлопца па-ціхаму прывезлі, завялі праз нейкі іншы ўваход і хутка зачыталі прысуд.
Яны ўжо па факце даведаліся, што ён асуджаны.
Дзяўчыну памятаеце? Дык вось у пратаколе напісана, што яна яго пазнала. Але подпісу яе няма.
Мы не ведаем, колькі людзей яшчэ не апазнана. Аднаму-двум званілі з міліцыі, але яны сказалі, што без позвы не пойдуць.
Прыязджалі дахаты, але аднаго хлопца дома не было. Дарэчы, яго зусім на відэа не можа быць, бо яго на матчы не было ў той дзень».
Аднаго з асуджаных павінны вызваліць сёння ўвечары, другога — у сераду.
27 студзеня ў сеціве з'явіўся здымак, на якім 23 фанаты дзесяціразовага чэмпіёна краіны па футболе барысаўскага БАТЭ сфатаграфаваліся з бел-чырвона-белым сцягам і плакатамі «Трымайся, Украіна, мы з вамі!» і «Героям слава!»
Пазней грамадзкі актывіст Сяржук Салаш паведаміў, што на ўсіх 23-х барысаўскіх удзельнікаў акцыі салідарнасці з украінскім Еўрамайданам падрыхтаваныя судовыя пастановы на розныя адміністрацыйныя тэрміны.
Прэс-служба УУС Мінскага аблвыканкама пацвердзіла Свабодзе, што два фанаты Барысаўскага БАТЭ пакараныя за акцыю салідарнасці з украінскім народам, іншых — шукаюць.
