05.02.2014 / 17:53

Як будзе «кёрлінг» па-беларуску? Прыдумайма слова 61

7 лютага ў Сочы пачынаюцца Алімпійскія гульні. Не першы раз медалі будуць разыграныя ў такім незвычайным відзе спорту, як кёрлінг. Думаю, многія з вас бачылі трансляцыі чэмпіянатаў свету па кёрлінгу на «Еўраспорце». Спачатку смяешся, а потым цяжка адарвацца ад экрана.

Кёрлінг — гэта камандная гульня. Удзельнікі каманд па чарзе пускаюць па лёдзе гранітныя камянюкі. Перамагае той, чый камень аказваецца бліжэйшы да мішэні («хаткі»). Вялікае захапленне заўзятараў выклікаюць спартоўцы, якія бегаюць са швабрамі і націраюць лёд, каб задаць пэўную хуткасць і траекторыю «каменю».

Кёрлінг зарадзіўся ў Шатландыі ў XVI стагоддзі. Дакладнае паходжанне слова «кёрлінг» невядома. Англійскі корань curl перакладаецца як «завіток, кучарашка, пятля». Адхіленне каменя ад траекторыі таксама называюць curl.

Раней кёрлінг таксама называлі roaring game (літаральна «рыкаючая гульня»), з-за гукаў, якія выдавалі камяні падчас руху. Таму, магчыма, назва паходзіць не ад ангельскага curl, а ад шатландскага curr — «грукатаць».

Трэці варыянт, што гульня абавязаная сваім імем старашатландскаму curlak, якое значыць «несціся хутка і рашуча».

Амаль ва ўсіх еўрапейскіх мовах гэты від спорт застаецца «кёрлінгам». Выключэннем з’яўляецца ісландская, літоўская і эстонская, у якіх любяць усе запазычанні замяняць самабытнымі адпаведнікамі. У літоўскай мове кёрлінг называецца akmenslydis, то бок «слізганне камянёў», а ў эстонскай – Jääkeegel, лядовы боўлінг.

А па-ісландску Krulla —той самы германскі корань.

Што да беларусаў у кёрлінгу, то летась лакальнага поспеху дасягнулі нашы дзяўчаты. На чэмпіянаце Еўропы ў Даніі яны выйгралі турнір у дывізіёне С (трэці па сіле). Тым самым атрымаўшы пуцёўку ў дывізіён B.

Калі Вы хочаце займацца кёрлінгам, то на «Мінск-Арэне» ёсць дзве адмысловыя дарожкі.

Прапануйце ў каментах, як можна называць «кёрлінг» па-беларуску? (Ды так, каб Вользе Карач спадабалася:).

Хочаш падзяліцца важнай інфармацыяй ананімна і канфідэнцыйна?

Зміцер Панкавец

0
Іван / Адказаць
05.02.2014 / 18:00
пусканне камянёў
0
Бівіс / Адказаць
05.02.2014 / 18:02
Прапануйце ў каментах, як можна называць «кёрлінг» па-беларуску? (Ды так, каб Вользе Карач спадабалася:). КАРАЧун ілі расКАРАЧка
0
Дзядзька з Вільні / Адказаць
05.02.2014 / 18:05
во дзіва. слухайце, ды колькі помню, у нас гэтую гульню заўжды слізгачом называлі. Нацягаюць хлопцы з разбітага млына старых жоранаў (былі такія невялічкія), да сажалкі падкоцюць - і давай слізгаць. Яны яшчэ так чокалі весела, як сутыкаліся адзін з адным. А каб тыя слізгачы ямчэй шпурляць, дык у дзірку жорана палку ўстаўлялі. Здаралася, праўда, і пад лёд жораны правальваліся, добра хіба што сажалка неглыбокая. Улетку выцягвалі. Было рогату. але швабрамі лёд не націралі, не было такой дураты.
Паказаць усе каментары/ 61 /
Каб пакінуць каментар, калі ласка, актывуйце JavaScript у наладах свайго браўзеру