Прадстаяцель Украінскай праваслаўнай царквы Кіеўскага патрыярхата (УПЦ КП) Філарэт перакананы, што расійскія войскі неўзабаве сыдуць з Крыма.
Пра гэта ён заявіў у каментары карэспандэнту Gazeta.ua.
У прыватнасці, патрыярх адзначыў, што царква моліцца, каб Гасподзь дапамог мірным шляхам вырашыць канфлікт на паўвостраве.
«Гасподзь мірным шляхам вырашыць гэты канфлікт. Вы ж бачыце, чым завяршыўся канфлікт у Кіеве? Януковіч збег», — сказаў святар.
Паводле яго слоў, экс-прэзідэнт пацярпеў поўнае паражэнне, калі ў царкве перасталі маліцца за яго здароўе.
«І сышоў тады, калі царква спыніла маліцца за ўладу. Так і тут будзе. Для Бога няма нічога немагчымага», — адзначыў Філарэт.
Па яго перакананні, войскі прэзідэнта Расіі Уладзіміра Пуціна цалкам сыдуць з Крыма.
«Ён забярэ свае войскі, уключаючы базы ЧФ РФ», — спрагназаваў прадстаяцель УПЦ КП.
Адначасова на ўдакладняючае пытанне, калі гэта адбудзецца, ён адказаў: «Гэта толькі Богу вядома. Але мы дажывём да гэтага моманту», — падкрэсліў Філарэт.
