ЗША не прызнаюць вынікі рэферэндуму, які адбыўся ў нядзелю ў Крыме. Пра гэта гаворыцца ў заяве прэс-сакратара Белага дома, распаўсюджаным Радай нацбяспекі ЗША ў твітары.
«Мы не прымаем «рэферэндум», які адбыўся сёння ў Крымскім рэгіёне Украіны. Гэты рэферэндум супярэчыць Канстытуцыі Украіны, і міжнародная супольнасць не прызнае вынікі апытання, якое адбылося пад пагрозай гвалту і запалохвання, а таксама пры расійскім ваенным умяшанні, якое парушае міжнароднае права», — сказаў прадстаўнік Белага дома.
Па словах прадстаўніка, «ніякія рашэнні аб будучыні Украіны не павінны прымацца без удзелу ўкраінскага ўрада».
«Больш за тое, гэта галасаванне не мела патрэбы. Украінскі ўрад ясна даў зразумець аб сваёй гатоўнасці абмеркаваць пашырэнне аўтаноміі Крыма. Прэзідэнцкія выбары, запланаваныя на 25 мая, даюць законныя магчымасці для ўсіх украінцаў, каб іх галасы пра будучыню сваёй краіны былі пачутыя», — дадаў прадстаўнік Белага дома.
