Потым да пікетоўцаў пад’ехалі два міліцэйскія аўтамабілі з нумарамі О749 МН і 9041 ВТ‑7. Міліцыянты , якія не назваліся, заявілі, што пікет нібыта не дазволены і паспрабавалі перашкодзіць акцыі. Супраць дачок Аляксандра Казуліна Вольгі і Юлі людзі ў цывільным ужылі сілу і адабралі партрэты Аляксандра Казуліна, на якіх было напісана «Свабоду Казуліну!»
«Паводле нашых зьвестак, гэта быў СОБР — міліцэйскі спэцназ. Мы заявілі, што акцыя дазволеная і патрабавалі ад іх назвацца. Тады яны зьехалі. Атрымліваецца, што ўлады адной рукой дазваляюць пікет, а другой робяць ўсё, каб сарваць акцыю», — пракамэнтаваў падзеі на пікеце былы адвакат Аляксандра Казуліна Ігар Рынкевіч.
Пры канцы пікету міліцыянты вярнулі партрэты.
«Без прабачэньняў, але вярнулі. Такім чынам, плякаты з Казуліным ужо на свабодзе, засталося дамагчыся вызваленьня яго самога», — сказаў Ігар Рынкевіч.
Пікет быў прымеркаваны да гадавіны галадоўкі Аляксандра Казуліна ў віцебскай калёніі, цягам якой экс‑кандыдат на прэзыдэнта пратэставаў супроць знаходжаньня ва ўладзе Аляксандра Лукашэнкі і патрабаваў разгляду беларускага пытаньня ў Радзе бясьпекі ААН. Летась Аляксандр Казулін быў асуджаны на 5,5 гадоў зьняволеньня паводле абвінавачаньня ў хуліганстве і арганізацыі вулічных беспарадкаў.