Ні пра якую рэарганізацыю Нацыянальнай Акадэміі навук або пераўтварэнне яе ў грамадскую арганізацыю гаворка не ідзе.
Аб гэтым Аляксандр Лукашэнка заявіў 31 сакавіка на нарадзе з вядучымі вучонымі па пытанні перспектыў развіцця навукі, паведамляе прэс-служба прэзідэнта Беларусі.
На яго думку, «жыццё сёння ставіць перад Акадэміяй навук новыя агульнадзяржаўныя задачы — навуковае суправаджэнне маштабных інавацыйных праектаў, такіх як, напрыклад, выкарыстанне сістэмы дыстанцыйнага зандзіравання Зямлі, будаўніцтва Беларускай АЭС, развіццё біятэхналагічнай галіны, нанаіндустрыі, вытворчасці мікра- і оптаэлектронікі і шэрагу іншых».
«Мы разглядаем Нацыянальную акадэмію навук Беларусі як ядро ўсёй навуковай сферы, якое канцэнтруе ў сабе лепшыя навуковыя сілы і вядзе самы шырокі ў краіне спектр даследаванняў. Таму ні пра якую рэарганізацыю акадэміі, а тым больш пра пераўтварэнне яе ў грамадскую арганізацыю гаворка не ідзе. І наўрад ці будзе ісці ў агляднай будучыні», — адзначыў Лукашэнка.
Пры гэтым ён падкрэсліў, што НАН неабходна вырашыць пытанні аптымізацыі структуры і штатнай колькасці сваіх навуковых арганізацый. Лукашэнка лічыць, што «рэзервы тут вялікія»: у Акадэміі навук працуе больш чым 17 тысяч чалавек, з якіх даследчыкі складаюць толькі траціну.
Ён даручыў ураду і НАН у 2014 годзе прыняць меры па скарачэнні штатнай колькасці супрацоўнікаў Акадэміі, што фінансуюцца з бюджэту, і яе падначаленых арганізацый. Паводле яго слоў, вызваленыя сродкі стануць крыніцай павышэння зарплаты.
Лукашэнка таксама адзначыў, што ў галіновым сектары працуе больш чым 50% работнікаў, занятых у навуковай сферы, і выконваецца каля паловы ўсіх даследаванняў і распрацовак у краіне.
Пры гэтым ён падкрэсліў, што «аддача ад іх пакуль слабая»: толькі чвэрць прадпрыемстваў краіны ўкладваюць сродкі ў тэхналагічныя інавацыі, тады як, напрыклад, у Германіі гэты паказчык даходзіць да 70%, доля штогод рэалізуемай інавацыйнай прадукцыі ў Беларусі не дасягнула парога навукова-тэхналагічнай бяспекі ў 20%. «Значная частка кіраўнікоў папросту не праяўляе зацікаўленасці як у фінансаванні даследаванняў, так і ва ўкараненні іх вынікаў. Гэтую сітуацыю трэба выпраўляць», — сказаў Лукашэнка.
Ён звярнуў увагу на тое, што цяпер ствараюцца холдынгі — аналагі замежных карпарацый. «Але вельмі рэдка ў іх прысутнічаюць даследчыя структуры. Без затрат уласных сродкаў на навуковыя прапрацоўкі свайго прадукту канкурыраваць на рынках ужо немагчыма», — сказаў Лукашэнка і даручыў ураду заняцца вырашэннем гэтага пытання.
Ён лічыць, што трэба больш актыўна прыцягваць у навукова-інавацыйную сферу прыватны капітал, развіваць дзяржаўна-прыватнае партнёрства ў рэалізацыі інавацыйных праектаў, асабліва з удзелам малога і сярэдняга бізнесу.
Лукашэнка паставіў ураду задачу забяспечыць рэалізацыю гэтых і іншых мер, накіраваных на актывізацыю галіновай навукі і павышэнне эфектыўнасці выкарыстання яе вынікаў для стварэння канкурэнтаздольнай прадукцыі.
