СТВ, 23.15
Закон жаданьня (La ley del deseo)
Гішпанія, 1987, каляровы, 102 хв.
Рэжысэр: Пэдра Альмадовар
Ролі выконваюць: Антоніа Бандэрас, Эйсэбіа Панцэла, Кармэн Маўра, Мігель Маліна, Фэрнанда Гілен
Жанр: Драма
Прэміі: Прэмія “Тэдзі” Бэрлінскага кінафэсту, прэміі кінафэсту ў Багаце за найлепшую рэжысуру, сцэнар, мантаж – усяго 9 узнагародаў і 3 намінацыі
Адзнака: 7 (з 10)
Гісторыя палкага любоўнага трохкутніка, дзе жарсьць прыводзіць да забойства…
Скандальная стужка Пэдра Альмадовара з маладым Антоніа Бандэрасам. Паназакручаны сюжэт, дэтэктыўныя інтрыгі, надрывы гішпанскае мэлядрамы. Як заўжды ў Альмадовара – любоўны трохкутнік цалкам мужчынскі (Бандэрас нат зьняўся ў рызыкоўных сцэнах). Але ў адрозьненьні ад наступных стомленых стужак майстра, карціна “Закон жаданьня” мае драйв – і зьдзіўляе сваё нэпрычэсанасьцю й дзёрзкаю рэжысурай.
НТВ-Беларусь, 23.25
АНТ, 01.30
Страх сцэны (Stage Fright)
Вялікабрытанія, 1950. чорна-белы, 110 хв.
Альфрэд Хічкок
Ролі выконваюць: Джэйн Ўайман, Марлен Дзітрых, Майкл Ўайлдзінг, Рычард Тод, Алістар Сім
Жанр: Трымценьнік
Прызы: Прыз МКФ у Лакарна, намінацыя на прэмію Эдгара По за найлепшы фільм
Адзнака: 7 (з 10)
Студэнтка Ева спрабуе адвесьці ад свайго сябра абвінавачаньні ў забойстве, у якіх павінная тэатральная зорка Шарлота (Марлен Дзітрых). Але жыцьцё не прытрымліваецца схемаў, і выкананьне галоўнай ролі на сцэне можа завершыцца сьмерцю…
Карціну Альфрэда Хічкока “Страх сцэны” крытыкуюць за празьмерную тэатральнасьць і недастатковы саспенс. Але рэжысэр, які заўжды выкарыстоўваў умоўнасьць у сваіх мэтах, разгортвае гаваркое відовішча з плоймай гумару й фірмовай іроніі.
Хічкок, які любіў тыраніць актораў і заяўляў, што найлепшыя выканаўцы ва Ўолта Дыснэя, бо непатрэбнае можна сьцерці – нарваўся ў “Страху сцэны” на Марлен Дзітрых.
Што з гэтага атрымалася – менскіх на тэлеэкранах. На фота – Альфрэд Хічкок і Марлен Дзітрых.
Божа, як мне пасуе жалоба! Ці нельга вось гэты выраз на сукенцы глыбей зрабіць? Ды яшчэ наперадзе начапіць якую-небудзь цацанку… (Удава Шарлота ў выкананьні Марлен Дзітрых)
