Нямецкая гандлёвая сетка Zurbrueggen па памылцы выставіла на продаж кубкі кітайскай вытворчасці з выявай Адольфа Гітлера.
«Гэта жудасна, гэта ідыёцкі збег няўдалых абставінаў», — друкаванае выданне Neue Westfälische цытуе ўладальніка гандлёвай сеткі Крысціяна Цурбрюгена. Ён ужо прынёс пакупнікам прабачэнні.
Малюнак на кубку ў вышэйшай ступені супярэчлівы, асабліва для Нямеччыны, дзе выкарыстанне нацысцкай сімволікі забаронена законам. Сярод ружачак і радкоў верша на англійскай мове на белым фоне няўдалы дызайнер змясціў выяву паштовай маркі наміналам у 30 пфенігаў з партрэтам Гітлера ў профіль. Завяршае калаж паштовы штэмпель са свастыкай.
Уся партыя — каля 5 тыс. адзінак — ужо знятая з продажу. 175 кубкаў, аднак, ужо паспелі купіць. Іх уладальнікам прапануецца вярнуць пакупкі ў краму, наўзамен яны атрымаюць сертыфікат на 20 еўра, на які змогуць набыць нешта іншае.
Як патлумачыў камерсант, кубкі крама замовіла ў Кітаі. Відавочна, дызайнер не ведаў, чый партрэт змяшчае на кубак.
«Падчас разгрузкі і сартавання ніхто не заўважыў гэтай праблемы», — растлумачыў ўладальнік крамы.