Арыштаваны дырэктар прыватнай інфармацыйна-асветніцкай установы «Платформ інавейшн» Андрэй Бандарэнка. Яму выстаўленыя абвінавачванні.
Як паведамляе сайт «Платформы», Бандарэнка быў арыштаваны супрацоўнікамі Кастрычніцкага РУУС Мінска яшчэ 1 красавіка. Зараз ён знаходзіцца ў сталічным следчым ізалятары № 1 на вуліцы Валадарскага. Праваабаронцу выстаўленыя абвінавачванні ва ўчыненні злачынства, прадугледжанага артыкулам 339 (хуліганства) Крымінальнага кодэкса Рэспублікі Беларусь.
«Зараз у дачыненні да Андрэя Бандарэнкі супрацоўнікамі Кастрычніцкага раённага аддзела Следчага камітэта вядуцца следчыя дзеянні, — гаворыцца ў паведамленні. — ПКПУ «Платформ інавейшн» працягвае працаваць у звычайным рэжыме».
Андрэй Бандарэнка, дырэктар прыватнай інфармацыйна-асветніцкай установы «Платформ інавейшн», якая займаецца праблемай выканання правоў чалавека ў месцах пазбаўлення волі, неаднаразова праследаваўся ўладамі за сваю праваабарончую дзейнасць, у тым ліку караўся адміністрацыйнымі арыштамі.