У Харкаве мітынгі скончыліся стрэламі. Заблакаваны будынак мэрыі ФОТА ВІДЭА
абнаўляецца
Людзі з бітамі і георгіеўскімі стужкамі напалі на прыхільнікаў адзінства Украіны каля помніка Шаўчэнкі ў Харкаве, паведамляе «Інтэрфакс-Украіна».
Падчас веча «евромайданаўцы» трымалі нацыянальныя сцягі і плакаты супраць сепаратызму. Тая ж тэма гучала і ў выступоўцаў. Усяго сабралася да тысячы чалавек.
У гэты час прарасейску настроеныя ўдзельнікі іншага мітынгу праходзілі з плошчы Свабоды. Яны крычалі «Расія, Украіна, Беларусь», «Фашысты не пройдуць». У некаторых актывістаў былі захунутыя твары.
Калі актывісты Майдана разыходзіліся, некалькі сотняў маладых людзей з розных бакоў напалі на ўдзельнікаў акцыі.
Па словах відавочцаў, кардон міліцыі з аднаго боку не дазволіў «георгіеўцам» наблізіцца да мітынгоўцаў, але тым удалося напасці з боку парку Шаўчэнкі.
Відавочцы таксама сцвярджаюць, што людзей, якія паспрабавалі схавацца ў метро, дагналі і збілі. Пацярпелі мінімум 3 чалавекі. На фота — ст. метро «Універсітэт».
Разам з тым, жанчыны з георгіеўскімі стужкамі спрабавалі дабіваць зьбітых з крыкамі «гэта нелюдзі».
Мясцовае выданне «Главное» паведаміла, што прагучалі стрэлы і разрывы і што аднаго параненага «еўрамайданаўца» забралі на «хуткай». Паступаюць дадзеныя і пра іншых пацярпелых — з абодвух бакоў.
«10 чалавек пацярпелі па папярэдняй інфармацыі, цяжкіх няма. Ніхто не шпіталізаваны», — паведаміла намеснік гарадскога галавы Харкава Святлана Гарбунова-Рубан.
У МУС таксама паведамілі, што ў выніку сутычкі пацярпеў адзін міліцыянт.
«Пры гэтым прарасейскія шавіністы спрабуюць патрапіць ў Палац дзіцячай творчасці, дзе могуць знаходзіцца дзеці», — пішуць СМІ.
Пазней відавочцы супольнасці Еўрамайдан SOS паведамілі, што ў цэнтры горада «неспакойна: да плошчы Свабоды падцягваюцца прарасейскія апалчэнцы. Пад'язджаюць на машынах, мікрааўтобусах. Апранаюць шлемы, маскі і балаклавы, дастаюць з багажнікаў біты, трубы. На вуліцах Сумская і Рымарская шмат людзей з расейскімі сцягамі. Міліцыі шмат, але яна да іх досыць лаяльная».
А 5-й гадзіне вечара сепаратысты з бітамі заблакавалі будынак Харкаўскага гарадскога савета, паведамляе ТСН.
Як паведамілі ў гарсавеце, ёсць інфармацыя, што мэр горада Генадзь Кернес знаходзіцца ў будынку. Як сцвярджаюць відавочцы, частка сепаратыстаў здолела прарвацца ва ўнутраны двор будынка, б'е вокны на першым паверсе гарсавета.
Каментары