02.05.2014 / 17:05

«Фэст на Грушаўцы» і экскурсія па раёне — як жыхары старога Мінска святкавалі Першамай ФОТА 13

Жыхары сталічнага мікрараёна Грушаўка вырашылі адсвяткаваць 1 мая незвычайным чынам: увесь дзень у парку на вул. Папаніна праводзілася свята «Фэст на Грушаўцы».

Цягам некалькіх месяцаў 40 ініцыятыўных гараджан збіраліся на арганізацыйныя сустрэчы, прыдумлялі розныя цікавосткі для будучага мерапрыемства. У выніку атрымалася праграма, дзе кожны змог знайсці штосьці на свой густ: у адной частцы парка вучылі пекчы хлеб і шыць мяккія цацкі, побач кожны мог паўдзельнічаць у конкурсе на найлепшую шпакоўню, паспрабаваць танчыць lindy hop, узяць удзел у кірмашы ці пачаставацца гарбатай з сапраўднага самавара. Таксама ў парку арганізавалі спецыяльныя зоны для дзяцей, аматараў кіно і ўладальнікаў ровараў.

Ідэю абмяркоўвалі і прасоўвалі з дапамогай сацыяльных сетак і сайта Грушаўкі, а калі дата і час былі вызначаныя, на вуліцах з’явіліся друкаваныя аб’явы-запрашэнні.

Да таго ж, невялікая група аматараў гісторыі Мінска зладзіла імправізаваную экскурсію па Грушаўцы. Зараз забудоўшчыкі зносяць старыя баракі па вуліцах Папаніна і Дзекабрыстаў, частка парку перакапаная, а ад шыкоўнай дзіцячай пляцоўкі ў выглядзе драўлянага замка не засталося нічога.

Усе гэтыя будынкі гістарычна былі раёнам чыгуначнікаў, які уваходзіў у мяжу горада. Чыгуначнік да рэвалюцыі быў даволі багатым чалавекам, такая «працоўная арыстакратыя». На Паўночным завулку і ў Грушаўцы былі жылыя дамы для тых, хто працаваў на абедзьвюх чыгунках: Маскоўска-Брэсцкай і Лібава-Роменскай, і таму тут засталося шмат характэрных назваў: вуліцы Чыгуначная, былая Пакгаўзная (цяпер — Хмялеўскага) і г.д.

Першыя пабудовы на Грушаўскай, на Разінскай з’явіліся ў другой палове 1890-х гадоў. Некаторыя будынкі нашмат старэйшыя, знаўцы Мінску кажуць, што, магчыма, некаторыя дамы перавозілі з іншых месцаў, бо практыка такая была. З вёскі ўзялі хату, прывезлі ў горад, у новым месцы сабралі. Ваду ў гэтыя старыя дамы правялі толькі ў 1985 годзе.

«Грушаўская вуліца цягнецца на 3 км і ідзе ажно да Уманскай, - кажа Вадзім Зелянкоў, неабыякавы да гісторыі Мінска гараджанін. - І там таксама Грушаўка, хоць і дальняя, са сваімі экзатычнымі закуткамі».

На адной з вуліц знаходзіцца невялічкая царква, яна змешчаная проста ў адной з хат. «Спачатку ў ёй хто толькі не жыў, а цяпер там зрабілі царкву з пэўнай, калі можна так сказаь, спецыялізацыяй: туды прыходзяць маліцца анкалагічныя хворыя, працягвае аповед спадар Зелянкоў. - Яна там зразумела часовая, на перыяд будоўлі сапраўднага вялікага храма, але цікава, што ў Мінску ёсць толькі пару цэркваў, пабудаваных у прыватным сектары. Побач з царквой — пустка, дзе раней была крама-гастраном «На ганачку». Там прайшоў тунэль метро, і ўсё мала-мальскае знеслі».

Адным з ініцыятараў экскурсіі быў Сяржук Голік, які мае задуму сабраць як мага больш фота і гісторыяў менчукоў. Адмыслова для «Фэста на Грушаўцы» ён стварыў экспазіцыю з архіўнымі фотаздымкамі жыхароў раёна.

Гэта першае падобнае мерапрыемства, да таго ж, афіцыйна дазволенае мясцовай адміністрацыяй. Але пры гэтым усе майстар-класы, пляцоўкі і гульні людзі арганізавалі самі, і гэта выдатны прыклад таго, як некалькі дзясяткаў ініцыятыўных жыхароў могуць ператварыць традацыйную і даволі панылую першамайскую нагоду выпіць у парку ў яркае вясёлае свята для людзей усіх узростаў.

Настасся Храловіч

0
Корч / Адказаць
02.05.2014 / 17:27
Некалі малымі мы ў хакей на ёй ганялі, на праезджай частцы. Тамака машыны амаль ня езьдзілі, мо 1 на тры гадзіны. А на так званай дальняй Грушаўцы, што цікавага ? Тамака ж толькі хрушчоўкі стаяць абапал, сквер вадаканалю, школа 83-я...нейкія цэгляныя дзьвюхпавярховыя будынкі, з маленькімі кватэркамі, дзіцячы садок ці не нумар 199... Што там цікавага ? Тамака кватэры атрымоўвалі людзі ад кірпічнага заводу ды іншай прамзоны з біржы. А пра біржу (такі раён), дарэчы, вам вядома ? Біржу ўжо мусіць зусім спляжылі, канчаткова...
0
местный / Адказаць
02.05.2014 / 20:21
Понаехавшие хипстеры организовали фест. Молодцы. Вот только настоящие "аборигены" Грушевки это все действо воспринимали как заезжий цирк и в организации действительного участия не принимали.
0
Корч / Адказаць
02.05.2014 / 22:27
местный, На адной з фотак я мужыка пазнаў, ён, ведаю дакладна, мясцовы. Я яго часьцяком у краме спаткаў быў. А на іншай фотцы кінатэатар праглядваецца, на заднім пляне. То былы ''Авангард'' - кінатэатар майго дзяцінства. Зусім малога, мяне маці туды вадзіла, потым сам бегаў з хеўрай,..па Грушаўцы. Я думаў, што яго даўно ўжо разбурылі. Цікава, а што там цяпер, і які яго чакае лёс? Ён такі прыгожы быў, як вонкі, так і знутры. Вялізнае люстра, на ўсю сьцяну, памятаю, калёны, паркет, бліскучы ад полеру. Я нават памятаю прыгожа абрамленыя адтуліны ў зале, ў якіх гукаўзмацняльнікі стаялі.Яны формаю скрыпічны ключ нагадвалі. Там і другі паверх быў, дзе ў адным баку буфет быў. Я, як зусім малы быў, усё цікаваў, каб каму плюнуць адтуль, з другога паверху, на лысіну, неўпрыкмет, прасунуўшы галаву паміж калёнаў. Маці злавалася ў такім выпадку, тузала мяне за каўнер... Аднак фоткі так сабе. Грушаўкі на іх амаль няма.
Паказаць усе каментары/ 13 /
Каб пакінуць каментар, калі ласка, актывуйце JavaScript у наладах свайго браўзеру