Тысячы крымскіх татараў сустрэлі Мустафу Джэмілева на мяжы ў Армянску. Каб сустрэць яго, яны прарвалі мяжу расійскага спецназа. Многія з іх не маюць пры сабе дакументаў.
Людзі сустрэлі свайго лідара са слязамі на вачах, паведамляе агенцтва «Крымскія навіны». Яны скандуюць: «Народ! Радзіма! Крым!»
Людзі прачыталі малітву. Яны не хаваюць сваёй радасці, танчаць. У гэты ж час праходзіла нарада членаў Меджліса.
Людзі ўтварылі жывы калідор, праз які прайшоў Джэмілеў. Ён перасёк ўкраінскую мяжу, але праз КПП яшчэ не праходзіў.
У дадзены момант Мустафа Джемілеў у суправаджэнні каля пяці тысяч крымскіх татараў на чале са старшынёй Меджліса Рэфатам Чубаровым набліжаецца да крымска-расійскага КПП.
Уезд на паўвостраў заблакаваны расійскімі вайскоўцамі на «Уралах» і БТРах. Пра гэта паведаміла прэс-сакратар Меджліса Лэйла Муслімава.
Пасля гэтага в.а. міністра ўнутраных спраў Рэспублікі Крым Сяргей Абісаў прыехаў на мяжу ў Армянску і паведаміў прысутным, што Мустафу Джэмілева не пусцяць у Крым.
Аднак Меджліс заклікаў усіх крымскіх татараў выходзіць на асноўныя трасы паўвострава і перакрываць іх у знак пратэсту супраць забароны на ўезд у Крым Мустафы Джэмілева. Такое рашэнне было прынята на нарадзе Меджліса ў Армянску.
Крымскія татары працягваюць прыбываць на мяжу з усіх рэгіёнаў Крыму для падтрымкі свайго лідара. Сярод тых, хто сабраўся распаўсюджваецца інфармацыя, што ўлады «сцягваюць» у Армянск усю крымскую міліцыю і АМАП.
Нагадаем, што Расія забараніла Джэмілеву ўязджаць на тэрыторыю Крыму.
