Суд Баранавіцкага раёна і горада Баранавічы пастанавіў знішчыць дзяржаўны сцяг Украіны і плакат, з якімі грамадзянскі актывіст Уладзімір Гундар праводзіў адзіночны пікет салідарнасці з украінскім народам.
Як паведаміў Гундар, 15 мая ён атрымаў з суда адпаведны дакумент. «З яго вынікае: рашэнне аб знішчэнні гэтых «рэчавых доказаў», якое абскарджанню і апратэставанню не падлягае, прынята на падставе таго, што пастанова суда аб прыцягненні мяне да адміністрацыйнай адказнасці за правядзенне гэтага пікета набыло законную сілу», — сказаў Гундар.
Актывіст нагадаў, што 4 сакавіка ў Баранавічах ён прыйшоў на плошчу Леніна і разгарнуў плакат са словамі: «Пуцiнскiя бандагрэсары — геть з Украiны! Прэч — з Беларусi!» На плячах у яго быў украінскі сцяг. Праз дзесяць хвілін да Гундара падышлі супрацоўнікі міліцыі, якія праверылі яго дакументы, спыталіся, ці доўга ён будзе стаяць, і пайшлі. Яшчэ праз дзесяць хвілін яны вярнуліся і затрымалі актывіста. У аддзяленне міліцыі ў дачыненні да яго склалі пратакол за правядзенне несанкцыянаванага пікета, канфіскавалі сцяг і плакат, пасля чаго адпусцілі.
21 сакавіка суд Баранавіцкага раёна і Баранавічаў прызнаў Гундара вінаватым на падставе арт. 23.34 КоАП і аштрафаваў на 15 базавых велічыняў (1 млн. 950 тыс. рублёў).
«Я лічу пастанову суда аб знішчэнні сцяга вандалізмам у дачыненні да дзяржаўных сімвалаў Украіны і дыскрэдытацыяй знешняй палітыкі Беларусі», — заявіў Гундар.
