23.05.2014 / 18:51

Рух «За Свабоду» заклікае ўлады Беларусі адмяніць візы для грамадзян Еўрасаюза і некаторых іншых краін 2

Рух «За Свабоду» заклікаў улады Беларусі адмяніць візавы рэжым для грамадзян дзяржаў — членаў Еўрасаюза і дзяржаў — кандыдатаў на ўступленне ў ЕС, а таксама Швейцарыі, Нарвегіі, Ісландыі, Ліхтэнштэйна, Японіі, Канады і ЗША. Пра гэта гаворыцца ў звароце, размешчаным на сайце арганізацыі.

«У нацыянальных інтарэсах Беларусі развіваць больш цесныя міжчалавечыя кантакты з развітымі краінамі свету. Пазітыўны вопыт увядзення бязвізавага рэжыму падчас чэмпіянату свету па хакеі паказвае, што Беларусь тэхнічна поўнасцю гатовая на такі крок. Нашай краіне ёсць што паказаць і чым прыцягнуць добрасумленных наведвальнікаў. Турызм у Беларусь можа стаць адной з ключавых галін для стварэння новых працоўных месцаў, эканамічнага росту і прыцягнення інвестыцый», — мяркуюць у руху «За Свабоду».

Увядзенне бязвізавага рэжыму з краінамі ЕС, а таксама неадкладнае ўвядзенне ў дзеянне дагавора аб малым прыгранічным руху з Польшчай і Літвой, зазначаюць у арганізацыі, стануць дадатковым аргументам на карысць Беларусі падчас правядзення перамоў аб спрошчаным візавым, а надалей і бязвізавым рэжыме з краінамі ЕС.

Паводле звестак Дзяржпагранкамітэта на раніцу 21 мая, правам бязвізавага ўезду ў Беларусь, які быў уведзены для гледачоў чэмпіянату свету па хакеі, скарысталіся каля 29 тысяч балельшчыкаў прыкладна 50 краін. Лідарамі сярод іх з'яўляюцца грамадзяне Латвіі. З 25 красавіка ў Беларусь іх прыехала больш як 10 тысяч; паводле звестак на 19 мая — 7 тысяч. Затым ідуць грамадзяне Літвы — каля 3.500, Польшчы — 2.500, Славакіі — каля 2.000, Фінляндыі — больш за 1.700, Чэхіі — 1.500, Германіі — крыху менш за 1.500. Сярод балельшчыкаў, гасцей і ўдзельнікаў ЧС-2014, якія перасеклі беларускую мяжу без віз, таксама 275 грамадзян Канады і 432 — ЗША.

0
Анатоль Сідарэвіч / Адказаць
23.05.2014 / 19:52
Іншага клопату, як візы, у руху "За Свабоду", відаць, няма. То ім хочацца халяўных візаў для грамадзян Беларусі ў краіны ЕС, то бязвізавага ўезду замежных грамадзян у Беларусь. Гэта, на іх думку называецца, уцягваннем Беларусі ў Еўропу.
0
Кнехт / Адказаць
23.05.2014 / 22:12
ХАЦЯТ ШПІЁНАЎ НАПУСЦІЦЬ! Нільзя ім этава прасціць - Хацят шпіёнаў напусціць! А це узнают наш "сакрэт" - Што ў Беларусі ... бульбы нет! Какой пазор! Какой скандал! Штоб не ані, ніхто б не знал.
Каб пакінуць каментар, калі ласка, актывуйце JavaScript у наладах свайго браўзеру