Грамадскі актывіст Юрый Рубцоў, які вызваліўся сёння з гомельскага ізалятара часовага ўтрымання (ІЧУ), шпіталяваны пасля 30 сутак зняволення і галадоўкі.
Як паведаміў БелаПАН юрыст Леанід Судаленка, Рубцова павінны былі вызваліць у 4.10, аднак сустрэць яго каля гомельскага ІЧУ не ўдалося. «У вызначаны час дзяжурны паведаміў, што Рубцоў ужо вызваліўся, куды яго павезлі — невядома. Не ведалі, дзе знаходзіцца іх муж і бацька, таксама яго жонка і сын, якія сустракалі яго каля ІЧУ. І толькі пазней сваякі высветлілі, што Рубцова вывезлі з ІЧУ ў Чыгуначны райаддзел міліцыі для гутаркі», — сказаў юрыст.
Калі Рубцова адпусцілі з РАУС, сваякі адвезлі яго ў бальніцу ў сувязі з дрэнным самаадчуваннем.
Нагадаем, Рубцоў быў затрыманы міліцыяй у Мінску 26 красавіка пасля традыцыйнай акцыі апазіцыі «Чарнобыльскі шлях». На мітынгу ён быў апрануты ў футболку з надпісамі «Лукашэнка, сыходзь!» і «Арыштуйце мяне! Падстава? Я супраць Лукашэнкі». 28 красавіка суд Савецкага раёна сталіцы прызнаў яго вінаватым у «непадпарадкаванні законным патрабаванням службовай асобы», «дробным хуліганстве» і пакараў 25-сутачным арыштам. Футболку ў актывіста канфіскавалі. У знак пратэсту супраць прыгавору Рубцоў аб'явіў галадоўку.
Вечарам 21 мая, пасля заканчэння тэрміну арышту, Рубцова з цэнтра ізаляцыі правапарушальнікаў адвезлі на чыгуначны вакзал Мінска і пасадзілі на цягнік да Гомеля, аднак пасля прыезду туды ён зноў быў затрыманы. 22 мая суд Чыгуначнага раёна Гомеля прыгаварыў яго на пяць сутак арышту нібыта за непадпарадкаванне супрацоўнікам міліцыі і нецэнзурную лаянку ў грамадскім месцы. Рубцоў зноў аб'явіў галадоўку.
Такім чынам, галадоўка пратэсту гомельскага актывіста цягнулася 30 сутак.
