Спікер Антытэрарыстычнай аперацыі (АТА) Уладзіслаў Селязнёў паведаміў, што тэрарыстам у Данецку выстаўлены ўльтыматум: або яны здадуцца, або будуць знішчаныя з высокадакладнай зброі.
Пра гэта Селязнёў заявіў на брыфінгу.
Селязнёў распавёў пра сітуацыю ў Данецку. Паводле яго слоў, раніцай 26 мая, а менавіта ў 4.30, каля 200 баевікоў, сярод якіх былі замежнікі, захапілі аэрапорт. Пасля гэтага кіраўніцтва АТА выставіла баевікам ультыматум аб капітуляцыі. Тым, хто гатовы скласці зброю, кіраўніцтва АТА гарантавала бяспеку.
«Аднак баевікі не прынялі нашы ўмовы.
Таму былі пачаты дзеянні па знішчэнні тэрарыстаў. Была ўжытая авіяцыя. І тэрарысты, якія знаходзіліся ў тэрмінале аэрапорта, былі знішчаны або рассеяны. Мы маем разведданыя аб усіх аб'ектах, дзе знаходзяцца баевікі. Цяпер мне вядома, што
выстаўлены яшчэ адзін ультыматум: у выпадку, калі баевікі не здадуцца, па гэтых аб'ектах будзе нанесены ўдар з ужываннем высокадакладнай спецыяльнай зброі», — сказаў Селязнёў.
Пры гэтым ён падкрэсліў, што ўкраінскія сілавікі не ваююць з цывільным насельніцтвам і не дапусцяць, каб у ходзе ліквідацыі тэрарыстаў пацярпелі цывільныя.
Таксама Селязнёў абверг распаўсюджаную ў Інтэрнэце інфармацыю пра смерці цывільных асоб у Данецку ад зброі ўкраінскіх сілавікоў.
Разам з тым ён адзначыў, што сярод тэрарыстаў ёсць замежныя найміты, у тым ліку і выхадцы з Каўказа. У той жа час Селязнёў сказаў, што не можа сцвярджаць, з якога менавіта рэгіёна Каўказа гэтыя найміты і ці з'яўляюцца яны чачэнцамі.
