02.06.2014 / 21:05

Прэмія Гедройца: першы — Бабкоў, другі — Клінаў, трэці — Мудроў ФОТА, ВІДЭА 19

дадаюцца фота і відэа

Ігар Бабкоў.

У Мінску абвясцілі пераможцаў літаратурнай прэміі імя Гедройца. Ганараванне адбылося ў кангрэс-холе гатэля «Вікторыя» (пр. Пераможцаў, 59).

Урачыстасць прайшла ў гатэлі «Вікторыя».

Справа — прадстаўнік Польскага інстытута Лукаш Адамскі, трэці справа — пасол Польшчы Лешак Шарэпка.

Пасол Польшчы Лешак Шарэпка.

Сябра журы, літаратуразнаўца Ціхан Чарнякевіч.

Філосаф Валянцін Акудовіч быў адным з вядучых фіналу.

Пісьменнік Уладзімір Арлоў.

Людміла Рублеўская.

Артур Клінаў.

Ігар Бабкоў, Артур Клінаў, Алена Брава, Людміла Рублеўская.

Гледачоў у зале, дзе мелася адбывацца ўганараванне, сабралася не дужа многа. Людзі рассаджваліся пад акампанемент гурту «Порт Манэ», які іграў на сцэне.

Пачаў імпрэзу Андрэй Хадановіч. Ён прачытаў верш Генадзя Бураўкіна. Кіраўнік Беларускага ПЭН-Цэнтра прапанаваў ушанаваць сп.Бураўкіна хвілінай маўчання.

Пасля акторы «Свабоднага тэатра» чыталі ўрыўкі з твораў усіх шасці фіналістаў прэміі.

Потым усіх фіналістаў запрасілі на сцэну і — урэшце — абвясцілі пераможцаў.

Уладальнікам першага месца стаў Ігар Бабкоў з раманам «Хвілінка. Тры гісторыі». Ён атрымае чэк на дзесяць тысяч еўра ад «ІдэаБанка». Абвяшчалі пераможцу пасол Польшчы ў Беларусі Лешак Шарэпка, пісьменнік Альгерд Бахарэвіч і прадстаўніца «ІдэаБанка».

Другое месца і права на творчую стыпендыю на востраве Готланд журы аддало пісьменніку і мастаку Артуру Клінаву з раманам «Шклатара». Трэцяе — празаіку з Полацка Вінцэсю Мудрову - за кнігу «Багун». Сп.Мудроў атрымае літаратурную стажыроўку ва Уроцлаве.

Адразу пасля цырымоніі ўручэння прэміі імя Гедройца яе лаўрэат Ігар Бабкоў расказаў НН пра сваю кнігу.

Вынікі галасавання пракаментаваў і сябра журы, пісьменнік Уладзімір Арлоў. «Барацьба між Бабковым, Клінавым і Мудровым была напружанай. Мы да апошняга не ведалі, які будзе вынік», — адзначыў ён.

***

Сёлета за галоўную ўзнагароду змагаліся наступныя кнігі і творцы:

Ігар Бабкоў. Хвілінка: Тры гісторыі. — Мінск: «Логвінаў».

Алена Брава. Дараванне. Прощение. Vergebung. — Мінск: «Звязда».

Сяргей Вераціла. Разбітае сэрца Вітаўта. — Мінск: «Мастацкая літаратура».

Артур Клінаў. Шклатара. — Мінск: «Логвінаў».

Вінцэсь Мудроў. Багун. — Полацк: «Полацкае ляда».

Людміла Рублеўская. Ночы на Плябанскіх млынах. — Мінск: «Мастацкая літаратура».

Зміцер Панкавец, відэа Аксаны Рудовіч, фота Сяргея Гудзіліна

0
Burbalka / Адказаць
02.06.2014 / 19:17
Даехаць да месца цяжка - далёка ад метро.
0
Лявон Баршчэўскі / Адказаць
02.06.2014 / 21:18
Віншаваньні галоўнаму і іншым ляўрэатам, а Ігару - і яшчэ зь ягоным юбілеем!
0
Юлій Каралёў / Адказаць
02.06.2014 / 21:55
Гедройць канчаткова ператварыўся ў прэмію, якую даюць не за літаратурны твор як такі, я за "асобу ў беларускай літаратуры". Думаў, што Гедройць Някляева - гэта выпадковасць, што, можа, журы рэальна ўпадабала яго халтурку, але ў гэтым годзе - проста крыштальная яснасць: 1) у сувязі з 50-годдзем, 2) самы дастойны з двух астатніх дастойных, і 3) дастойны чэл з рэгіёнаў. Літбажаволку і двум дамам з дзяржпрэсы прэмію даваць было ну ніяк. Ну, прынцып неблагі, але ў наступным годзе можна спрасціць адбор і выбіраць ляўрэатаў не за творы, а па сукупнасці заслуг перад беллітам.
Паказаць усе каментары/ 19 /
Каб пакінуць каментар, калі ласка, актывуйце JavaScript у наладах свайго браўзеру