 |
Гэтую статыстыку са спасылкай на Міністэрства эканомікі паведаміў у нядзелю 11 лістапада тэлеканал ОНТ. Неабходнасць змены статусу паўстала перад тымі бізнесоўцамі, што мелі наёмных працаўнікоў. Бо, паводле ўказу Аляксандра Лукашэнкі №760, з 1 студзеня такія прадпрымальнікі змогуць браць на працу толькі сваіх блізкіх сваякоў. Да 10 лістапада бізнесоўцы маглі змяніць статус на льготных умовах.
У Мінэканомікі пакуль не могуць ацаніць вынікі кампаніі. Кіраўніца прэс‑службы міністэрства Наталля Пацейка гаворыць, што аналізу гэтай кампаніі яны яшчэ не атрымлівалі. А старшыня Каардынацыйнай рады індывідуальных прадпрымальнікаў Мінску Аляксандр Макаеў лічыць кампанію па перарэгістрацыі праваленай.
‑ Дурныя законы для прадпрымальнікаў, для народа не трэба выконваць. З 1 студзеня — выхад у вымушаны адпачынак. Каб гэта лепш зрабіць арганізавана, з прадпрымальніцкай салідарнасцю, трэба зрабіць кавалак працы. Будуць два мітынгі 19 лістапада і 10 снежня. Дай Божа, каб людзі на іх прыйшлі. Трэба звяртацца да грамадства, да ўладаў. Бо ўлада пойдзе на саступкі, калі прадпрымальнікі змогуць салідарызавацца.
Каардынацыйная рада прадпрымальнікаў патрабуе, каб улады дазволілі правесці мітынг 10 снежня на Кастрычніцкай плошчы. А на 19 лістапада сваю акцыю на Бангалоры збіраецца правесці іншае прадпрымальніцкае аб’яднанне ‑«Перспектыва». Яго лідэр Анатоль Шумчанка аднак не падзяляе радыкальных настрояў свайго калегі Аляксандра Макаева.
‑ У прадпрымальнікаў вялікія праблемы наперадзе. Але людзі павінны жыць, зарабляць грошы. І бальшыня прадпрымальнікаў на сённяшні дзень падрыхтаваліся да таго, як абыходзіць гэты 760‑ы ўказ. Але гэта не значыць, што яны не будуць змагацца. Яны працягнуць барацьбу. Проста бізнесоўцы такія людзі, якія прагназуюць, плануюць і будуць зарабляць грошы незалежна ад таго, які сёння ўказ — 760‑ы, ці 302‑і.
Але ў некаторых індывідуальных прадпрымальнікаў праблемы пачынаюцца ўжо цяпер. Як паведаміла старшыня каардынацыйнай рады мінскага рынку «Ракаўскі кірмаш» Алена Васільчык, 53 прадпрымальнікі атрымалі лісты ад адміністрацыі рынка аб скасаванні дамовы арэнды. Іх месцы збіраюцца аддаць нейкай юрыдычнай асобе.
