Кіраўнік Днепрапятроўскай аблдзяржадміністрацыі (АДА) бізнэсмэн Ігар Каламойскі прапанаваў пачаць будаўніцтва умацаванай сцяны ўздоўж мяжы з Расіяй працягласцю ў 1920 км і коштам каля 100 млн еўра.
Намеснік кіраўніка Днепрапятроўскай АДА Генадзь Корбан перадаў праект будаўніцтва ў адміністрацыю прэзідэнта Украіны.
Гаворка ідзе пра ўзвядзенне на працягу шасці месяцаў суцэльнага металічнага плота з высокатрывалай сталі з калючым дротам, па якой будзе праходзіць электрычны ток.
Па словах прадстаўнікоў уладаў вобласці, галоўная задача праекта — «не дапусціць фізічнага пранікнення з боку дзяржавы, што агрэсіўна паводзіцца ў дачыненні да Украіны».
Будаўніцтва сцяны прадугледжана на тэрыторыі Данецкай, Харкаўскай і Луганскай абласцей.
Фінансаванне праекта мяркуецца за кошт дабрачынных фондаў, кажуць прадстаўнікі ўладаў Днепрапятроўскай АДА.
