Міністэрства сельскай гаспадаркі і харчу працягвае настойваць на падвышэньні закупачных цэнаў на малако на чвэрць, паведамляе БЕЛТА.
Паводле словаў першай намесьніцы міністра сельскай гаспадаркі і харчу Надзеі Каткавец, з такой прапановай міністэрства зьвярнулася да Міністэрства эканомікі і ўраду. У Мінсельгасхарчы сваю прапанову абгрунтоўваюць тым, што ў суседніх краінах закупачныя цэны падвысіліся ў параўнаньні зь беларускімі ўдвая, а таксама даражэюць матэрыяльныя рэсурсы. Міністэрства выступае за паэтапнае падвышэньне закупачных цэнаў на малако. Пры гэтым адзначаецца, што гэта наўпрост не адаб’ецца на канчатковым кошце малака ў крамах. Паводле разьлікаў, калі закупачная цана павялічыцца на 25%, то ў крамах пакет малака будзе каштаваць на 8% больш.
На сёньня, паводле Н. Каткавец, нягледзячы на падвышаны попыт на прадукцыю, вытворчасьць малака амаль не прыносіць прыбытку. Таму Мінсельгасхарч настойвае на вырашэньні гэтага пытаньня да канца бягучага году.
Варта нагадаць, што пра неабходнасьць падвышэньня закупачных цэнаў на малако міністар Мінсельгасхарчу Леанід Русак заявіў яшчэ напрыканцы кастрычніка. Міністар ужо тады казаў пра адпаведную пастанову Савета міністраў аб павышэньні закупачных цэнаў на жывёлагадоўчую прадукцыю, якая мусіла зьявіцца ў бліжэйшы час.
