16.11.2007 / 18:03

Не хвалюйцеся, прапішуць! 4

Загад прэзыдэнта — гэта вам не тралі-валі! Піша ў сваім блогу Аляксандар Класкоўскі.

Даверлівы мы ўсё ж народ! Сёньня шэраг айчынных сеціўных рэсурсаў радасна абвесьцілі, што улады, мусіць, "адмовяцца ад спробы адрэгуляваць інтэрнэт". Падставай сталі выказваньні дэпутаткі Тацяны Сафроненкі: маўляў, інтэрнэт кантраляваць прынцыпова немагчыма і ўсё такое.

Фактычна тое ж увесь час дзяўбуць вольныя інтэрнэтчыкі, але з вуснаў дзяржаўнай асобы — на тле папярэдніх заклікаў "спыніць анархію" ў Сеціве — такія лібэральныя пасажы цягнуць на сэнсацыю. Вагі ж ім надала публікацыя ня дзе-небудзь, а ў самой "СБ"!

Дык вось, спадарства, рана радавацца!

"Нідзе ў законапраекце ня знойдзеце нават такога панятку, як "інтэрнэт", — кажа дэпутатка. — Мы адмовіліся ад ягонага згадваньня ўвогуле, гэтак сама як і ад тэрміну "сайт".

Стоп, а пра які праект гаворка? Чорт хаваецца ў дэталях :) Гаворка ж ідзе выключна пра асобна ўзяты законапраект "Аб інфармацыі, інфарматызацыі і абароне інфармацыі". Ад яго сапраўды толькі пер'е паляцела пасьля крытыкі з боку Беларускай асацыяцыі журналістаў ды Міклаша Харасьці, прадстаўніка АБСЭ у пытаньнях свабоды мэдыяў. Магчыма, у Палаце ўжо і ня радыя былі, што (во гэта сапраўды была сэнсацыя!) дапусьцілі экспэртаў БАЖу да ўдзелу ў абмеркаваньні. Тыя як двойчы два давялі абсурднасьць ды анахранізм ці ня двух трацінаў артыкулаў.

Але ж гэты праект стаў рыхтавацца задоўга да таго, як кіраўнік дзяржавы падчас наведваньня рэдакцыі "СБ" у жніўні даў загад "прапісаць статут" інтэрнэт-мэдыяў. І зараз над выкананьнем задачы шчыруе адмысловая працоўная група (куды ўжо ніякія БАЖы не пралезуць!). Яе прапановы, як заяўлялася, стануць або асобным законам пра інтэрнэт, або новым разьдзелам у закон "Аб друку ды іншых сродках масавай інфармацыі". Ня надта дасьведчаныя аглядальнікі праз сугучнасьць назваў часта блытаюць гэты дзейны нарматыўны акт зь бязьлітасна абскубаным законапраектам "Аб інфармацыі...".

Так што ўсё тое, ад чаго адмежавалася спн. Сафроненка, можа ў найлепшым выглядзе зьявіцца пад іншай шыльдай. І пэўна ж зьявіцца. Бо загад прэзыдэнта — гэта вам не тралі-валі!

Пакуль што зьвесткі аб працы групы надта скупыя. Было абяцана вывучыць усясьветны досьвед і узяць найлепшае, але першы плён мазгавога штурму аказаўся зусім не арыгінальным. Нядаўна міністар інфармацыі заявіў, што трэ' будзе рэгістраваць сеціўныя вэрсыі друкаваных выданьняў. Так што хада думак зразумелая.

І вось на гэтым тле словы спн. Сафроненкі гучаць сапраўды крамольна: "У нас жа дзейнічае Адміністрацыйны кодэкс, ёсьць крымінальнае заканадаўства. Што да адказнасьці сеціўных мэдыяў за распаўсюджаную інфармацыю, я лічу, цалкам дастаткова".

Сапраўды, нашто тады асобны гарод гарадзіць? Хіба толькі дзеля таго, каб там паставіць вялікае пудзіла.

Вось так дэпутатка сваімі шчырымі развагамі міжволі агаліла палітычную звышзадачу тых, хто наважыўся прапісаць інтэрнэту асобны статут.

Не хвалюйцеся: прапішуць як мае быць!

Хочаш падзяліцца важнай інфармацыяй ананімна і канфідэнцыйна?

Аляксандар КЛАСКОЎСКІ.

0
Scooter / Адказаць
16.11.2007 / 19:18
Адзіная магчымасьць "забараніць" інтэрнэт - гэта забараніць усім карыстальнікам з Беларусі выходзіць на "нячэсныя" замежныя сэрверы, ну а зь мясцовымі ўжо разабрацца будзе лёгка. Вось толькі ці змогуць яны зафаерволіць усе "нячэсныя" сайты? Ці можа яны створаць зондэркаманду кегебе па адсочваньні і блакаваньні ЎСІХ ананімных проксі-сэрвакоў, праз каторыя можна будзе чытаць "нячэсныя" сайты? Вось толькі я сумняюся, што ўсе сэрвэры ім удасца блакаваць. А калі нельга забараніць УСЕ, дык навошта тады змагацца з млынамі?
0
Аляксандар КЛАСКОЎСКІ 2 Scooter / Адказаць
16.11.2007 / 19:27
А калі нельга забараніць УСЕ, дык навошта тады змагацца з млынамі? ============= Гэта не з млынамі! Могуць прыціснуць найперш тых, хто хоча легальна працаваць у Беларусі, то бок акурат найболей прафэсійныя рэсурсы. Уявеце сабе, што заўтра НН паўстае перад неабходнасьцю рэгістраваць вось гэты сайт... У нас жа любая рэгістрацыя лёгка ператвараецца ў нерэгістрацыю. Або зарэгіструюць і пачнуць вешаць папярэджаньні і г.д. Тэхналёгія добра адпрацаваная на папяровай прэсе. Так што задушыць не задушаць, але крыві папсуюць.
0
Scooter / Адказаць
16.11.2007 / 19:53
Ну і зарэгіструеце "афіцыйны", "правільны" сайт, які будзе называцца напрыклад nn.by +яшчэ 1 ці некалькі, ўмоўна кажучы realnn.eu або там realnashaniva.us на якія з nn.by будзе спасылка і дзе будзе публікавацца "нецэнзураваная" вэрсія :) У выпадку папярэджаньняў, або закрыцьця "афіцыйнай" вэрсіі (для гэтага ім прыйдзецца яшчэ знайсьці да чаго там прыдрацца, бо гэта ж будзе "правільная" вэрсія), застанецца некалькі нецэнзураваных вэрсій сайту, і хай яны паспрабуюць іх прыкрыць :) Гэта я да таго, што "кішка танка" нават у гэтага рэжыма змагацца з інтэрнэтам... (менавіта таму яны ніяк ня могуць прыдумаць як бы лепш забараніць, перашкодзіць, абмежаваць працу незалежных ад іх СМІ ў інтэрнэце, прычым зрабіць гэта так, каб гэтыя забароны нельга было абыйсьці) Але я вядома ж разумею, што галоўная праблема ні ў гэтым, а ў чарговых перашкодах для дзейнасьці незалежных ад рэжыму журналістаў... Тут ужо рэжым зробіць усё, каб паралізаваць іхнюю прафэсійную дзейнасьць.
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру