ДТЗ адбылося сёння, 27 чэрвеня, каля 9.30 на вуліцы Чырвоная.
Ля края праезнай часткі фармавалася калона аўтобусаў, якія павінны былі адвезці дзяцей на адпачынак у летнікі. У гэты час з боку праспекта Машэрава ў напрамку вуліцы Кісялёва рухаўся аўтамабіль «Дэу», які прыцягнуў увагу інспектараў.
«Кіроўцу быў пададзены сігнал аб спыненні. Але спыніўся аўтамабіль толькі пасля таго, як вадзіцель, які не даў рады кіраванню, здзейсніў наезд на прыпаркаваны аўтобус», — распавялі ў аддзеле ДАІ.
У ДТЗ ніхто не пацярпеў.
Толькі транспартныя сродкі атрымалі механічныя пашкоджанні. За рулём легкавіка быў 64-гадовы мужчына. Затрымаць яго ўдалося з дапамогай выпадковых відавочцаў, якія дапамаглі супрацоўніку ДАІ, забралі ключы ад аўтамабіля і дапамаглі пасадзіць кіроўцу ў патрульны аўтамабіль. Пазней медыцынскі агляд выявіў у кіроўцы 1,86 праміле алкаголю.
Цяпер праводзіцца праверка. Дзяржаўтаінспекцыя звяртаецца да грамадзян з просьбай паведамляць аб нецвярозых вадзіцелях па нумары 102. Ад такога тэлефанавання наўпрост залежыць дарожная бяспека, а, магчыма, і нечае жыццё.
