05.08.2014 / 17:07

На літоўскім «Галапагаі» «Крамбамбуля» прэзентавала новыя песні 6

А што гэта за краіна?» — памятыя, з голымі піўнымі торсамі, дабрадушныя літоўскія панкі тыкаюць пальцам на бел-чырвона-белы сцяжок на намёце. «Беларусь? Ды тут адныя беларусы! Мы з вамі!»

Сапраўды, на жывапісным востраве сярод возера ў літоўскім мястэчку Зарасай, у выходныя шчодра ўсеяным намётамі і сцэнамі, беларускіх сцягоў было нямала.

Galapagai, штогадовы музычны фестываль на «літоўскіх браславах», гучаў сёлета і па-беларуску.

На лясной сцэне, што як блізнец падобная да борыку Басовішча, літоўска-эстонска-латышска-беларускую моладзь весяліў жартамі і фізічнымі практыкаваннямі Віталь Артыст з «Без білета». А бліжэй да вечару галоўная сцэна фэсту выбухнула «Крамбамбуляй». Сэт гучаў настолькі моцна, што падпяваць пачалі і літоўцы, а самыя зацятыя наладзілі рэальны слэм. Беларусы ж і ўкраінцы, што дружным хорам спявалі ўсе крамбамбульныя хіты, крыху змаглі перадыхнуць хіба толькі на некалькіх новых песнях: узнёслая «Сэрца паўстанца», надзённая «Для чужых мы ўсе вар’яты» і баявая «Гэй ліцвіны, Бог нам радзіць!».

Невялікі востраў на возеры, што на сутыку Літвы, Латвіі і Беларусі, на некалькі дзён ператвараецца ў сапраўдныя Галапагосы, з яркай флорай і фаўнай:

панкі, фрыкі, простыя людзі, гопнікі, хіпстары, сем’і з малечай, байкеры, раварысты, нават аматары 3D-друку. Тут неверагодна спалучаюцца поп-выступы на адной сцэне з алеяй забаваў як на звычайным свяце гораду, і маладыя інды-выканаўцы на іншай сцэне, дзе публіка каардынальна розніцца. Некалькі пляжаў, безліч гульняў, акцыі, конкурсы… З розных сцэнаў гучаць AC/DC, Nirvana, Элвіс Прэслі, Цой — сёлета кавер-гурты тут асабліва ў фаворы.

«PapaiPapai!» — раніца апошняга дня фестывалю праводзіла намётавы гарадок ужо знаёмымі галасамі вясёлых асіплых панкаў. «Papai!..» — падхоплівалі стомленыя сонныя галасы з розных намётаў. Галапагаі, папаі… Па вяртанні пагуглілі пераклад развітальных клічаў:)

Выдатны разняволены фестываль, які для кожнай кампаніі свой, абсалютна разнастайны, чым і інтрыгоўны, аднак аднолькава чаканы. Фотамоманты з Galapagai версіі 2014 — у рэпартажы Generation.by.

0
brudny / Адказаць
05.08.2014 / 22:50
Мае вочы мяне падводзяць цi гэта сапрауды Памiдор на саксафоне??? Калi так, малойца, фiгурай заняуся))
0
1кг Свінных Плячоў / Адказаць
05.08.2014 / 23:48
Сапраўды падобны на памідора,далучаюсь да brudny.
0
Val / Адказаць
06.08.2014 / 00:47
Які яшчэ памідор? Гэта Павал Аракелян.
Паказаць усе каментары/ 6 /
Каб пакінуць каментар, калі ласка, актывуйце JavaScript у наладах свайго браўзеру