08.08.2014 / 15:01

У Расіі сацсеткі цяпер абавязаны ўзаемадзейнічаць з ФСБ 4

Урад Расіі ўдакладніў так званы «Закон аб блогерах».

Сацсеткі і іншыя папулярныя сайты абавяжуць мець абсталяванне і праграмнае забеспячэнне, з дапамогай якога спецслужбы змогуць у аўтаматычным рэжыме атрымліваць інфармацыю аб дзеяннях карыстальнікаў.

Прэм'ер-міністр Дзмітрый Мядзведзеў падпісаў 31 ліпеня пастанову ўрада №743, якая ўдакладняе закон аб блогерах. Яна прысвечаная ўзаемадзеянню спецслужбаў і «арганізатараў распаўсюджвання інфармацыі» — так у законе называюць сацсеткі, форумы і любыя сайты для зносін, даступныя ўсім карыстальнікам інтэрнэту.

Згодна з пастановай, сайты павінны падключаць абсталяванне і ПА для сілавікоў згодна з планам мерапрыемстваў, распрацаваных ФСБ.

Гэта пастанова забараняе сайтам раскрываць «арганізацыйныя і тэхнічныя прыёмы правядзення аператыўна-вышуковых мерапрыемстваў».

У пастанове няма ні слова пра тое, хто будзе плаціць за ўстаноўку на сайтах абсталявання і ПА для ФСБ. Паводле тэксту пастановы, для кожнага канкрэтнага сайта «кіраўнік аддзялення ФСБ» павінен будзе выбраць для ўзаемадзеяння падраздзяленне ФСБ.

Федэральны закон №97 «Аб унясенні змяненняў у Федэральны закон «Аб інфармацыі, інфармацыйных тэхналогіях і аб абароне інфармацыі» і асобныя заканадаўчыя акты РФ па пытаннях упарадкавання абмену інфармацыяй з выкарыстаннем інфармацыйна-тэлекамунікацыйных сетак» (вядомы як закон аб блогерах) ўступіў у сілу з 1 жніўня.

Фактычна закон прыраўноўвае папулярныя блогі да СМІ: іх аўтарам нельга лаяцца матам, распаўсюджваць недакладныя звесткі або экстрэмісцкія заклікі.

Закон таксама распаўсюджваецца і на пляцоўкі, дзе можна весці блогі — напрыклад, сацыяльныя сеткі.

Закон аб блогерах абавязаў такія пляцоўкі раскрываць інфармацыю аб наведвальнасці блогераў, іх кантакты, захоўваць на тэрыторыі Расіі дадзеныя аб дзеяннях сваіх карыстальніках на працягу шасці месяцаў і дзяліцца гэтай інфармацыяй са спецслужбамі.

0
цуд / Адказаць
08.08.2014 / 15:10
А быццам дагэтуль не ўзаемадзейнічалі...
0
літвін / Адказаць
08.08.2014 / 15:47
Матрыца будуецца...
0
Reimer / Адказаць
08.08.2014 / 15:58
Нічога новага ГБ прыдумаць ня можа, акрамя як сачыць за кожным і шукаць на кожнага кампрамат.
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру