11.08.2014 / 17:04

Новы старшыня Гродзенскага гарвыканкама Мечыслаў Гой — карыстальнік сацыяльных сетак 15

Сёння Аляксандр Лукашэнка зрабіў шэраг кадравых прызначэнняў. У асноўным яны тычыліся кіраўнікоў вертыкалі ўлады ў раённых і абласных цэнтрах.

Двух новых намеснікаў старшыні аблвыканкаму атрымалі ў Гомелі. Справа ў тым, што іх папярэднікі трапіліся на хабары, а цяпер чакаюць суда ў ізалятары. Новымі намеснікамі сталі старшыня Адміністрацыі Чыгуначнага раёна Гомеля Алег Пачынок і намеснік міністра спорту і турызму Уладзімір Прывалаў (ён раней працаваў у Гомельскім гарвыканкаме начальнікам аддзела па справах моладзі).

Звяртае ўвагу, што два нядаўна прызначаныя старшыні абласных КДБ Сяргей Церабаў і Аляксандр Церахаў прызначаныя членамі Гомельскага і Гродзенскага аблвыканкамаў адпаведна. Цікава, што на сайце БЕЛТА не з’явіліся іх фатаграфіі.

Нарэшце атрымаў кіраўніка горада Гродна. Справа ў тым, што ў пачатку года папярэднягя старшыню гарвыканкама Андрэя Худыка забралі ў Мінск намеснікам у Кіраўніцтва справаў прэзідэнта.

Новым «мэрам» Гродна стаў Мечыслаў Браніслававіч Гой, які да гэтага амаль дзесяць гадоў кіраваў Смаргонскім райвыканкамам.

Мечыславу Гою 51 год. Ён родам з вёскі Шловенцы Воранаўскага раёна (знаходзіцца на мяжы з Літвой). Для беларускага чыноўніка ён надзвычай добра прадстаўлены ў сацыяльных сетках. Напрыклад, мае сваю старонку Укантакце. Праўда, у яго там толькі 12 сяброў і 4 падпісчыкі, але старонка не закінутая. Час ад часу прадстаўнік вертыкалі яе наведвае. Вось скрын-шот ягонай старонкі.

Ён скончыў БДАТУ, аграмеханічны факультэт (1989), а таксама Акадэмію кіравання пры прэзідэнце (2004). У анкеце Укантакце пазначана канфесія «каталіцызм». Падпісаны сп.Гой усяго на дзве суполкі Сморгонь.org і Новости Витебска и области TUT.

Таксама ён мае старонку ў сацыяльнай сетцы пошты mail.ru «Мой мір». Жанаты, мае трох сыноў.

Смаргонскі раён — адзін з перадавых у Гродзенскай вобласці. На яго тэрыторыі знаходзяцца моцныя СПК «Солы» і «Жодзішкі». А таксама 18 прамысловых прадпрыемстваў. У 2009 у Смаргоні праходзіў Дзень беларускай пісьменнасці.

Гой напісаў уступнае слова да кнігі «Смаргоншчына літаратурная», дзе ў тым ліку добра адгукнуўся пра такіх ураджэнцаў краю як паэт Францішак Багушэвіч, кампазітар Міхал Клеафас Агінскі, мовазнаўца Янка Станкевіч, ксёндз Адам Станкевіч.

Зміцер Панкавец

0
quechua / Адказаць
11.08.2014 / 17:20
больш за паўгады ў Горадні не было галоўнага дыяганальнага і горад не разваліўся?:)
0
Так ёсьць! / Адказаць
11.08.2014 / 17:20
///...ў тым ліку добра адгукнуўся пра такіх ураджэнцаў краю як паэт Францішак Багушэвіч, кампазітар Міхал Клеафас Агінскі, мовазнаўца Янка Станкевіч, ксёндз Адам Станкевіч./// Багушэвіч і Агінскі не ўраджэнцы краю, калі пад "краем" разумець Гарадзеншчыну. Агінскі нарадзіўся пад Варшавай, Францішак - пад Вільняй. А вось ксёндз Станкевіч і мовазнаўца Янка Станкевіч - з-пад Крэва. Так ёсьць!
0
7-40 / Адказаць
11.08.2014 / 17:26
як гэта гой і на кіруючае пасадзе? куды толькі ZOG глядзіць?)
Паказаць усе каментары/ 15 /
Каб пакінуць каментар, калі ласка, актывуйце JavaScript у наладах свайго браўзеру