Былога «міністра абароны» самаабвешчанай «Данецкай народнай рэспублікі» (ДНР) Ігара Гіркіна чакае месячны адпачынак.
Пра гэта паведаміў «прэм'ер-міністр» ДНР Аляксандр Захарчанка, перадае расійскі сайт РБК.
Па словах Захарчанка, пасля адпачынку ў Гіркіна «будуць новыя заданні на тэрыторыі Новороссіі».
Ігар Гіркін, які выбраў сабе мянушку «Стралкоў», узначальваў групу дыверсантаў, якая ў красавіку захапіла Славянск, Краматорск і Чырвоны Ліман — стратэгічныя вузлы на захадзе Данбаса. З гэтай акцыі пачалася спроба адарваць ад Украіны Данецкую і Луганскую вобласці і далучыць іх да Расіі.
Аднак маскоўская прапаганда перастаралася: Гіркін стаў настолькі папулярным у Расіі, што загаварылі нават пра яго як пра канкурэнта Пуціну. Пасля гэтага тон прапаганды рэзка памяняўся. Гіркіна-Стралкова сталі вінаваціць у здачы Славянска.
Гіркіна знялі з пасады «міністра абароны» ДНР, а 15 жніўня «вярхоўны савет» ДНР зацвердзіў на пасадзе «міністра абароны» самаабвешчанай рэспублікі Уладзіміра Конанава.
Конанаў нарадзіўся ў 1974 годзе ў горадзе Горскі Луганскай вобласці. У 1995 годзе скончыў Славянскі авіяцыйны каледж грамадзянскай авіяцыі, а ў 1999 годзе — Славянскі дзяржаўны педагагічны інстытут. Па адукацыі ён настаўнік фізкультуры і трэнер.
