president.gov.by
Аляксандр Лукашэнка папярэджвае, што крэдытныя рэсурсы павінны накіроўвацца выключна на акупныя праекты.
Пра гэта ён заявіў сёння на нарадзе па пытанні выкарыстання кітайскіх крэдытных рэсурсаў.
Лукашэнка нагадаў, што ў свой час Кітайская Народная Рэспубліка выдзеліла Беларусі крэдытныя рэсурсы ў памеры $15-18 млрд пад розныя працэнтныя стаўкі. Звяртаючыся да прысутных на нарадзе, кіраўнік дзяржавы адзначыў, што хацеў бы пачуць, як асвойваюцца гэтыя сродкі, у якім памеры яны ўжо атрыманы і якія праекты рэалізуюцца.
«У нас ёсць добрыя рэшткі крэдытных рэсурсаў, якія ня выкарыстаны, пад 2-3% гадавых, у тым ліку і Кітайскай Народнай Рэспублікі. Хацелася б ведаць, куды першапачаткова мы гатовыя накіраваць гэтыя крэдытныя рэсурсы», — сказаў ён.
«Натуральна, што накіроўваць трэба выключна ў акупныя праекты, і чым раней яны акупяцца, тым лепш», — падкрэсліў Лукашэнка.
Кіраўнік дзяржавы звярнуў асаблівую ўвагу на тое, што грошы давядзецца вяртаць.
Частка крэдытных рэсурсаў была выкарыстаная на мадэрнізацыю аб'ектаў у энергетычнай, транспартнай сферах. Аляксандр Лукашэнка чакае адказу, як працуюць гэтыя прадпрыемствы.
«Самае страшнае, калі мы мадэрнізуем вытворчасць, а затым, атрымаўшы прадукцыю, мы не будзем ведаць, куды яе падзець.
Тады паўстане пытанне: а навошта мы бралі крэдыты, навошта выраблялі гэтую прадукцыю і хто будзе вяртаць гэтыя крэдыты, калі прадукцыя не будзе знаходзіць збыту?» — адзначыў ён.
«Гэта падобна на злачынства. І першы злачынец будзе міністр», — дадаў кіраўнік дзяржавы.
Аляксандр Лукашэнка адзначыў, што чакае ацэнкі Камітэта дзяржаўнага кантролю па гэтым пытанні.
