25.08.2014 / 21:11

З новага навучальнага года ў школьных буфетах уводзяцца дадатковыя абмежаванні на продаж фастфуду 2

З новага навучальнага года ў школьных буфетах Беларусі ўводзяцца дадатковыя абмежаванні на гандаль фастфудам: прадаваць піцу, смажанкі і сасіскі ў тэсце дазволена не больш як два разы на тыдзень, паведаміла загадчыца аддзялення гігіены дзяцей і падлеткаў Рэспубліканскага цэнтра гігіены, эпідэміялогіі і грамадскага здароўя Ала Малахава 25 жніўня на прэс-канферэнцыі ў Мінску. 

Паводле яе слоў, асартыментны пералік школьных буфетаў быў уведзены ў Беларусі ў 2004 годзе, бо тады «буфеты ператварыліся ў сметнік, дзе рэалізоўваліся любімыя дзецьмі некарысныя прадукты». З тых пор пералік прадуктаў пастаянна пераглядаецца, бо прадпрыемствы гандлю карыстаюцца сітуацыяй і, напрыклад, «пры забароне прадаваць каляровыя газаваныя напоі прадавалі неафарбаваныя салодкія газаваныя напоі, якія зараз таксама забароненыя». Цяпер у буфетах можна будзе прадаваць толькі напоі, прыгатаваныя ў сталовай. 

Школьныя сталовыя абавяжуць ствараць умовы для падагрэву ежы. У якасці агульнаўмацавальнага прадукту ў асартымент буфетаў уведзены гематаген, але не часцей як два разы на тыдзень. 

«Калі школьнікаў не абмяжоўваць, яны купляюць па пяць-шэсць смажанак, — сказала загадчыца аддзялення гігіены дзяцей і падлеткаў. — Мы вымушаныя выкарыстаць забаронныя меры, бо ў Беларусі павялічваецца колькасць дзяцей з залішняй масай цела. Наступствы лішняй вагі ў дзяцей — дыябет другога тыпу, а таксама артэрыяльная гіпертэнзія». 

Паводле звестак Міністэрства аховы здароўя, у апошнія 10 гадоў колькасць падлеткаў з залішняй вагой павялічылася ў два разы, а хворых на цукровы дыябет — у паўтара. Медыкі звязваюць гэта з не збалансаваным па якасці і каларыйнасці харчаваннем. 

Для захавання здароўя дзяцей, паводле слоў Малахавай, важная правільная арганізацыя дамашняга і школьнага харчавання. Спецыяліст падкрэсліла, што «бацькі маюць права цікавіцца, чым і як кормяць іх дзяцей», і ўнутраны кантроль вельмі важны, бо, згодна з заканадаўствам, планавыя праверкі праходзяць у сталовых не часцей як раз на год.

0
root / Адказаць
25.08.2014 / 21:59
Вялікі клопат)) Ёсць школы, напрыклад у сельскай мясцовасці, дзе няма школьных буфетаў. Затое ля школы знаходзіцца крама, дзе прадаюцца тыя ж чыпсы, ролтаны, кока-кола, сухарыкі. І ніхто не перашкаджае шкалаце бегаць у тую краму і псаваць сабе страўнікі. Школу ж не будуць зачыняць на замкі, дзеці занадта адукаваныя ў прававой сферы...
0
киевлянин / Адказаць
26.08.2014 / 08:28
Что такое «смаженки»? Что-то жареное?
Каб пакінуць каментар, калі ласка, актывуйце JavaScript у наладах свайго браўзеру