Каля сотні параненых вайскоўцаў даставілі ў Санкт-Пецярбург.
Пра гэта паведаміла член Савета пры прэзідэнце Расіі па развіцці грамадзянскай супольнасці і правах чалавека і старшыня «салдацкіх маці Санкт-Пецярбурга» Эла Палякова у тэлефоннай размове з «Дождем».
«Прыйшоў борт з вельмі вялікай колькасцю параненых у ваенна-медыцынскую акадэмію», — распавяла яна. Гаворка ідзе пра Ваенна-медыцынскую акадэмію імя С.М. Кірава ў Санкт-Пецярбургу.
Паводле яе інфармацыі, на борце было каля сотні параненых вайскоўцаў. Дзе і пры якіх абставінах яны атрымалі раненні, ёй пакуль невядома. Яна пераправярае гэтую інфармацыю.
Як вядома, у вёсцы Выбуты пад Псковам раніцай 25 жніўня адбылося пахаванне дэсантнікаў, якія загінулі пры невядомых абставінах.
Журналіст расійскага тэлеканала Уладзімір Роменскі, які адправіўся ў Пскоў і зняў кадры на могілках у Выбутах, сутыкнуўся з пагрозамі ў свой адрас ад невядомых людзей, якія параілі яму не спрабаваць нічога высветліць.
У эфіры тэлеканала «Дождж» Роменскі распавёў пра тое, як адрэагавалі сваякі загінулых на з'яўленне журналістаў і чаму амаль усім прадстаўнікам СМІ, якія прыехалі ў Пскоў, паступаюць пагрозы ад невядомых, інфармуе news.еizvestia.com.
Журналіст распавядае, што прычынамі смерці, якія афіцыйна паказваюцца ў дакументах вайскоўцаў, з'яўляюцца інфаркт і інсульт, нягледзячы на тое, што некаторыя загінулыя былі зусім маладымі людзьмі.
26 жніўня стала вядома, што Палякова і другі член Савета Сяргей Крывенка накіравалі запыт у Следчы камітэт з просьбай правесці расследаванне абставінаў гібелі кантрактнікаў 18-й мотастралковай брыгады (в/ч 27777), ураджэнцаў Дагестана.
Паводле афіцыйнай версіі, яны загінулі на палігоне ў Растоўскай вобласці 9 і 11 жніўня.
Як патлумачыла Палякова, двухтыднёвая затрымка з накіраваннем запыту следчым была звязана з неабходнасцю пераправерыць інфармацыю.
