У Беларускай праваслаўнай царкве могуць быць утвораны новыя епархіі. Аб гэтым паведаміў 17 верасня журналістам у Брэсце мітрапаліт Мінскі і Слуцкі, патрыяршы экзарх усяе Беларусі Павел пасля сустрэчы з кіраўніцтвам Брэсцкай вобласці.
«Мы будзем у найбліжэйшы час выходзіць з такой ініцыятывай. Я думаю, што свяцейшы патрыярх і Свяшчэнны сінод нас падтрымаюць, — сказаў кіраўнік БПЦ. — Гэта дасць магчымасць на месцах архірэям бліжэй быць да прыхаджан, да святароў».
Мітрапаліт Павел адзначыў, што менавіта таму па рашэнні патрыярха Маскоўскага і ўсяе Русі Кірыла, падтрыманага Свяшчэнным сінодам і архірэйскім саборам, сёння ўтвараюцца новыя епархіі, новыя мітраполіі. З буйных епархій выдзяляюцца новыя.
Кіраўнік БПЦ высока ацаніў уклад уладыкі Філарэта ў развіццё Беларускай праваслаўнай царквы. «Уладыка Філарэт зрабіў шмат. Бо ў савецкі час у Беларусі быў толькі адзін архірэй. Цяпер — 13. Але гэта яшчэ не мяжа», — падкрэсліў мітрапаліт Павел.
У ходзе сустрэчы кіраўнік Брэсцкай вобласці Канстанцін Сумар адзначыў важную ролю царквы ў духоўным выхаванні грамадства і сказаў, што кожны новы храм, як і новая школа, стварае пэўную аўру, дае пазітыўны імпульс у жыцці рэгіёну.
На мерапрыемстве паведамлялася, што, паводле звестак маніторынгу, 80% апытаных вернікаў вобласці называюць сябе праваслаўнымі. На тэрыторыі Брэсцкай епархіі зарэгістравана 205 прыходаў (з іх 16 — у Брэсце). У вобласці дзейнічае 180 цэркваў, яшчэ 23 — будуюцца, адраджаецца манастырскае жыццё, ствараюцца нядзельныя школы.
Дапоўнім, што сустрэча ў аблвыканкаме адбылася ў межах візіту мітрапаліта Паўла ў Брэст 17—19 верасня, прымеркаванага да дня шанавання прападобнамучаніка Афанасія Брэсцкага, які адзначацца 18 верасня.
17 верасня мітрапаліт Павел узначаліў усяночную ў Свята-Сімяонаўскім кафедральным саборы, а 18 верасня возьме ўдзел у традыцыйным хрэсным ходзе і правядзе літургію ў Афанасьеўскім мужчынскім манастыры.
Праграмай візіту таксама запланаваны наведванне кіраўніком БПЦ Раство-Багародзічнага жаночага манастыра, сустрэчы з духавенствам Брэсцкай епархіі, прадстаўнікамі сястрыцтваў міласэрнасці і маладзёжных брацтваў, з асабовым складам Брэсцкай пагранічнай групы, наведванне цэнтра медыцынскай рэабілітацыі для дзяцей з псіханеўралагічнымі захворваннямі «Тонус».
